តុលាការសម្រេចទោសឱ្យបុរសអ្នកនេសាទម្នាក់ជាប់ពន្ធនាគារ ក្រោយល្មើសបម្រាមនេសាទច្រើនដង

ចាប់ពីរដូវបិទនេសាទរហូតមកដល់ពេលនេះខណ្ឌរដ្ឋបាលជលផលបានធ្វើការផ្សព្វផ្សាយអប់រំណែនាំ និងធ្វើកិច្ចសន្យាបញ្ឈប់ការនេសាទខុសច្បាប់នៅតាមអន្លង់អភិរក្សជាកន្លែងហាមឃាត់តែជនខិលខូចមួយចំនួនមិនអនុវត្តតាមការណែនាំត្រូវបានកម្លាំងជលផលធ្វើការឃាត់ខ្លួនបញ្ជូនទៅតុលាការសម្រេចដាក់ពន្ធនាគារកាលពីរសៀលថ្ងៃទី ១០ ខែកញ្ញាឆ្នាំ ២០២៣ នេះហើយ។

លោក ម៉ា សុខៈ ប្រធានសហគមន៍នេសាទកាំងដីសបានបញ្ជាក់ថា៖ ជនសង្ស័មានឈ្មោះ ម៉ុក រ៉ុកអាយុ ៣២ ឆ្នាំ រស់នៅភូមិស្វាយ ឃុំកោះស្រឡាយ ស្រុកសៀមបូក ខេត្តស្ទឹងបានធ្វើសកម្មភាពឆក់ត្រីពេលយប់ ហើយកម្លាំងយើងឃាត់ខ្លួននៅវេលាម៉ោង ៣៖១០ នាទី ថ្ងៃទី ៩ កញ្ញា ឆ្នាំ ២០២៣ និងបានដកហូតវត្តុតាងដូចជា-ទូកស្មាច់ ៥,៩ម x ០.៦ម   ០១ គ្រឿង-ម៉ាស៊ីនហ៊ីណូតា ១៣សេស ០១ គ្រឿង-ថ្នងដងត្រី ០១ គ្រឿង-ត្រីចំម្រុះ ចំនួន ៣គីឡូ។

លោកបន្តថា៖ ចំណែកក្បាលឆក់ និងអាគុយជនសង្ស័យបានទម្លាក់ទឹកចោលពេលកម្លាំងយើងបើកទូកដេញប្រកៀកប្រកិត ហើយការបូបដាក់ក្បាលឆក់បានរមូរជាប់ជាមួយស្លាបចក្រប៉ាស៊ីនទើបទូកទៅមុខមិនរួចបានឃាត់ខ្លួនបានកុំអីរត់រួចទៀត។

លោក ស្រី សំវិចិត្រ នាយខណ្ឌរដ្ឋបាលជលផល ស្ទឹងត្រែងបានបញ្ជាក់ថា៖ នេះជាបទល្មើសជាក់ស្តែង នៅពេលមន្ត្រីជំនាញ ចុះធ្វើសកម្មភាពល្បាតអភិរក្សត្រីមេពូជក្នុងរដូវបិទនេសាទបានប្រទះ ជនសង្ស័យប្រព្រឹត្តបទល្មើសនៅចំណុច កាំងតាម៉ាំង ភូមិស្វាយ ឃុំកោះស្រឡាយ ស្រុកសៀមបូក ខេត្តស្ទឹងត្រែង (ស្ថិតក្នុងតំបន់អភិរក្សសត្វផ្សោតកោះសន្ទក់)។

លោកបន្តថា ខណៈពេលដែលកំពុងដេញប្រផាប់ចាប់ប្រភីង ជនសង្ស័យបានទំលាក់វត្ថុតាងមួយចំនួនចូលទឹកទន្លេ រួមមាន អាគុយ និងក្បាលឆក់ ដាក់ក្នុងកាបូប ហើយកាបូបនោះបានទាក់ជាមួយស្លាបចក្រម៉ាស៊ីន ទើបទូកទៅមុខរួចត្រូវឃាត់ខ្លួនបានតែម្តងយកមកអនុវត្តតាមនិតិវិធី។

ប្រជាពលរដ្ឋនៅឃុំកោះស្រឡាយសាទរជាមួយមន្ត្រីជំនាញបានខិតខំប្រឹងប្រែងធ្វើសកម្មភាពអភិរក្សត្រីមេពូជក្នុងរដូវបិទនេសាទនេះ  ហើយសូមសំណូមពរទៅអ្នកដែលមានឧបករណ៍ឆក់សូមប្រគល់ឱ្យទៅមន្ត្រីជំនាញទៅល្អជាង ដើម្បីយើងរួមគ្នាថែរក្សាធនធានមច្ឆជាតិ និងបញ្ចៀសការទៅដេកនៅពន្ធនាគារចោលកូនប្រពន្ធ។

សូមបញ្ជាក់ថា៖ ជនសង្ស័យឈ្មោះម៉ុករ៉ុកបានបញ្ជូនខ្លួនទៅពន្ធនាគារតាមនិតិវិធីនៃច្បាប់ជលផលជាអំពើល្មើស និងមាត្រាទី២០ត្រូវផ្តន្ទាទោសដាក់ពន្ធនាគារពី៣ឆ្នាំទៅ ៥ ឆ្នាំ ចំណែកវត្ថុតាំងត្រូវរឹបអូសជាសម្បត្តិរដ្ឋ៕

អត្ថបទ៖ ងិនលីម