មន្ត្រីនគរបាលដែលបើករថយន្តបុកស្ត្រីម្នាក់ស្លាប់នៅកោះរាជាស្វាមីស្ត្រីរងគ្រោះ

បុរសជនសង្ស័យ ឈ្មោះ សូត្រ សិទ្ធី អាយុ៥៣ ឆ្នាំ តួនាទីនាយរងការិយាល័យនគរបាលភស្តុភារ អង្គភាពអន្តរាគមន៍ព្រែកឯង ត្រូវបានចាប់ឃាត់ខ្លួន និងបញ្ជូនទៅកាន់តុលាការបន្ទាប់ពីបើករថយន្ត Highlander ស្លាកលេខភ្នំពេញ 2AB 4983 ទៅបុកស្រ្តីម្នាក់ធ្លាក់ពីលើម៉ូតូ រួចបន្តបើកកិនបណ្តាលឲ្យស្លាប់នៅមុខវត្តឫស្សីស្រស់ ភូមិកោះនរា សង្កាត់និរោធ ខណ្ឌច្បារអំពៅ នៅរសៀលថ្ងៃទី ១៣ ខែកញ្ញា ឆ្នាំ២០២៣។

តាមប្រភពព័ត៌មានពីមន្ត្រីនគរបាលសុំមិនបញ្ចេញឈ្មោះ បានបញ្ជាក់ថា ជនបង្ក និងស្ត្រីរងគ្រោះជាប្ដីប្រពន្ធនឹងគ្នា។ស្ត្រីជនរងគ្រោះឈ្មោះ ព្រុំ អ៊ាង អាយុ៦៤ឆ្នាំ រស់នៅភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ។

ប្រភពដដែលបានឱ្យដឹងថា បុរសជាប្តីបានចុះចោលផ្ទះទៅរស់នៅភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញដោយសារទំនាស់ក្នុងគ្រួសារ។

បើតាមមន្ត្រីនគរបាល ធាតុពិតជនបង្កមានចេតនាបង្កហេតុដោយបើករថយន្ត Highlander តាមពីក្រោយស្ត្រីរងគ្រោះ ខណៈកូនស្រីកំពុងឌុបម្ដាយទៅផ្សារដោយជនបង្កជាប្តីបានបើករថយន្តបុកម៉ូតូជនរងគ្រោះពីក្រោយរួចកិនក្បាលស្ត្រីរងគ្រោះបណ្តាលឲ្យស្លាប់រួចយករថយន្តទៅប្លុងចោលនៅក្បែរបងវិទ្យាល័យច្បារអំពៅចម្ងាយ២គីឡូម៉ែត្រពីចំណុចកើតហេតុដោយបានដោះស្លាកលេខរថយន្តចោលមុនគេចខ្លួច។ បច្ចុប្បន្នជនបង្កត្រូវបានសមត្ថកិច្ចចាប់ខ្លួនបញ្ជូនទៅតុលាការចាត់ការតាមច្បាប់៕

អត្ថបទ៖ នរា