ឃាត់ខ្លួនជនសង្ស័យ៥នាក់ ជាមុខសញ្ញាប្លន់យ៉ាងសកម្ម

ជនសង្ស័យ៥នាក់ពាក់ព័ន្ធករណីប៉ុនប៉ងប្រព្រឹត្តបទល្មើស ធាក់ និងកាប់ប្លន់យកម៉ូតូពីប្រជាពលរដ្ឋត្រូវបានកម្លាំងជំនាញ  នៃអធិការដ្ឋាននគរបាលខណ្ឌដង្កោ ធ្វេីការស្រាវជ្រាវចាប់ឃាត់ខ្លួនកាលពីវេលាម៉ោង៤និង៣០នាទីទាបភ្លឺ ថ្ងៃទី១៨ ខែកញ្ញា ឆ្នាំ២០២៣ ត្រង់ចំណុចស្ថានីយ៍ប្រេងតូតាល់ ស្តុបឬស្សីសាញ់ ផ្លូវបេតុងព្រៃស ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។

សមត្ថកិច្ចជំនាញបានបញ្ចាក់ថា ជនសង្ស័យចំនួន៥នាក់ដែលឃាត់ខ្លួនរួមមាន៖ ទី១/ឈ្មោះ ញ៉ែម ពន្លក ហៅ រតនា ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។ ទី២/ឈ្មោះ ហេន រ៉ាឌី ហៅ ឌី ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល សង្កាត់បឹង សាឡាង ខណ្ឌទួលគោក រាជធានីភ្នំពេញ។ ទី៣/ឈ្មោះ ហនទិត្យ ច័ន្ទដារ៉ា ហៅ រ៉ា ភេទប្រុស អាយុ១៨ឆ្នាំ ជនជាតិខ្មែរ មុខរបរនៅផ្ទះ ទីលំនៅភូមិមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ទី៤/ឈ្មោះ លី ធា ភេទប្រុស អាយុ១៨ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះជួល ភូមិដំណាក់ធំ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ (អ្នកយកម៉ូតូទៅលក់០៣គ្រឿង)។ និងទី៥/ឈ្មោះ ប៉ែន សុខគា ហៅ ហួ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល ភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ រាជធានីភ្នំពេញ។

ក្នុងប្រតិបត្តិការឃាត់ខ្លួនសមត្ថកិច្ចបានដកហូត កាំបិតប៉័ងតោមួយដេីម ទូរស័ព្ទដៃម៉ាកOPPO ពណ៌ខ្មៅចំនួន០១គ្រឿង, ទូរស័ព្ទដៃម៉ាកXiaomi ពណ៌ខ្មៅចំនួន០១ ម៉ូតូម៉ាកស៊ុយស៊ូគីនិច ពណ៌ខៀវលាយសពាក់ស្លាកលេខបាត់ដំបង1AI-8003 ចំនួន០១គ្រឿង ម៉ូតូម៉ាកហុងដាសេ១២៥ ពណ៌ទឹកមាស ពាក់ស្លាកលេខកណ្តាល1AC-3443 ចំនួ០១គ្រឿង។

គួរបញ្ជាក់ថា កាលពីថ្ងៃទី១៨ ខែកញ្ញា ឆ្នាំ២០២៣ វេលាម៉ោង០៤និង៣០នាទី សមត្ថកិច្ចនគរបាលខណ្ឌដង្កោ បានជិះម៉ូតូល្បាតក្នុងភូមិសាស្ត្រ ដល់ចំណុចស្ថានីយ៍ប្រេងសាំងតូតាល់ ផ្លូវបេតុង ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ក៏បានឃើញជនសង្ស័យចំនួន០៤នាក់ ជិះម៉ូតូ០២គ្រឿង ដោយសមត្ថកិច្ចមានការសង្ស័យ ក៏បានហៅឱ្យធ្វើការត្រួតពិនិត្យឃើញវត្ថុតាងខាងលេីសម្រាប់ប្រព្រឹត្តបទល្មើស ដែលជនសង្ស័យឈ្មោះ លី ធា ស្ពាយជាប់នៅនឹងខ្លួន ហើយសមត្ថកិច្ចក៏បានឃាត់ខ្លួនជនសង្ស័យរួមទាំងវត្ថុតាង យកមកធ្វើការសាកសួរនៅអធិការដ្ឋាននគរបាលខណ្ឌដង្កោតាមនីតិវិធីច្បាប់។

ក្រោយពីធ្វើការសាកសួរ ជនសង្ស័យបានឆ្លើយសារភាពប្រាប់សមត្ថកិច្ចថា ពួកគេពិតជាបានជិះម៉ូតូឌុបគ្នាដើម្បីធ្វើសកម្មភាពធាក់ និងកាប់ប្លន់យកម៉ូតូរបស់ប្រជាពលរដ្ឋតាមដងផ្លូវសាធារណៈក្នុងរាជធានីភ្នំពេញប្រាកដមែន ហើយកន្លងមកពួកគេ និងបក្ខពួកផ្សេងទៀតធ្លាប់បានធ្វើសកម្មភាពធាក់ និងកាប់ប្លន់យកម៉ូតូតាមផ្លូវសាធារណៈក្នុងរាជធានីភ្នំពេញ បានសម្រេចជាច្រើនលើក រួចសមត្ថកិច្ចបានធ្វើការស្រាវជ្រាវឃាត់ខ្លួនជនសង្ស័យជាបក្ខពួកបានចំនួន១នាក់ទៀត ឈ្មោះ ប៉ែន សុខគា ហៅ ហួ ភេទប្រុស អាយុ១៨ឆ្នាំ ត្រង់ចំណុចផ្ទះជួល ស្ថិតនៅភូមិត្នោតជ្រុំ៤ សង្កាត់ បឹងទំពុន២ ខណ្ឌមានជ័យ យកមកធ្វើការសាកសួរនៅអធិការដ្ឋាននគរបាលខណ្ឌដង្កោតាមនីតិវីធីច្បាប់។

ក្រោយពីធ្វើការសាកសួរជនសង្ស័យទាំង០៥នាក់បានឆ្លើយសារភាពប្រាប់សមត្ថកិច្ចថា ពួកគេពិតជាបានធ្វើសកម្មភាពធាក់ និងកាប់ប្លន់យកម៉ូតូរបស់ជនរងគ្រោះតាមផ្លូវសាធារណៈជាច្រើនលើក ហេីយជាក់ស្តែងនៅថ្ងៃទី២ ខែកញ្ញា ឆ្នាំ ២០២៣ ជនសង្ស័យទាំង៥នាក់បានធ្វើសកម្មភាពធាក់ និងកាប់ប្លន់យកម៉ូតូម៉ាក ហុងដាសេ១២៥ ពណ៌ខ្មៅ សេរីឆ្នាំ២០២២ ពាក់ស្លាកលេខភ្នំពេញ1JG-2103 ចំនួន០១គ្រឿងរបស់ជនរងគ្រោះឈ្មោះ យ៉ុង យ៉ាន ភេទស្រី អាយុ ៥២ឆ្នាំ ជនជាតិខ្មែរ មុខរបរកម្មការិនីរោងចក្រ ទីលំនៅសៀមរាប ឃុំសៀមរាប ស្រុកកណ្តាលស្ទឹង ខេត្តកណ្តាល ត្រង់ចំណុចផ្លូវក្រវ៉ាត់ក្រុងទី៣ ស្ថិតនៅភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ ប្រាកដមែន។

បច្ចុប្បន្នជនសង្ស័យ និងវត្ថុតាងត្រូវបានសមត្ថកិច្ចជំនាញកសាងសំណុំរឿងត្រៀមបញ្ចូនទៅតុលាការដេីម្បីផ្តន្ទាទោសតាមច្បាប់៕ 

អត្ថបទ៖ សុខា