បុរសជាប្ដីដាច់ចិត្តសម្លាប់ប្រពន្ធព្រោះរឿងប្រចណ្ឌនៅខេត្តកំពង់ឆ្នាំង

បុរសជាប្ដីម្នាក់បានកាប់ប្រពន្ធស្លាប់រួចរត់ទៅចងកសម្លាប់ខ្លួនតាមក្រោយ។ ហេតុការណ៍នេះ បានកើតឡើងនៅវេលាម៉ោង ២ រំលងអធ្រាតឈានចូលថ្ងៃទី ៥ ខែតុលា ស្ថិតនៅភូមិបឹងលាច ស្រុកសាមគ្គីមានជ័យ ខេត្តកំពង់ឆ្នាំង។

ប្រភពព័ត៌មានពីប្រជាពលរដ្ឋបានឱ្យដឹងថា ស្ត្រីរងគ្រោះជាប្រពន្ធឈ្មោះ កែវ ស្រីអូន អាយុ ៣២ឆ្នាំ និងប្ដីឈ្មោះ លី សារិន អាយុ ៣៤ឆ្នាំ ទាំងពីរនាក់ប្រកបមុខរបរកាប់គោលក់ ពួកគេមានកូនចំនួន២នាក់ រស់នៅភូមិនកើតហេតុខាងលើ។

មុនពេលកើតហេតុនៅព្រលប់ថ្ងៃទី ០៤ ខែតុលា ប្ដីប្រពន្ធទាំងពីរនាក់បានទាស់ទែងគ្នាជាខ្លាំងម្ដងហើយ ក្រោយមកក៏មានការសម្របសម្រួលពីបងប្អូនក៏បានស្ងប់ទៅវិញ ហើយក៏នាំគ្នាចូលដំណេករៀងៗខ្លួន។

ស្រាប់តែនៅម៉ោង ២ រំលងអធ្រាត្រ​ឈានចូលថ្ងៃទី ០៥ ខែតុលា បុរសជាប្ដីបានយកកាំបិតមកកាប់ប្រពន្ធជាច្រើនកាំបិត បណ្ដាលឱ្យស្លាប់ បន្ទាប់មក បុរសជាប្ដីបានទៅចងកសម្លាប់ខ្លួនៅផ្ទះបាយ។

នៅក្នុងហេតុការណ៍នោះ កូនប្រុសអាយុ ០៩ ឆ្នាំម្នាក់បានឃើញសកម្មភាពក៏រត់ទៅប្រាប់ជីតាហើយក៏មានការភ្ញាក់ផ្អើល។
ប្រភពពីប្រជាពលរដ្ឋរស់នៅជិតខាងបានឲ្យដឹងថា គ្រួសារពីរនាក់ប្ដីប្រពន្ធតែងទាស់គ្នាជារឿយៗដោយសារប្ដីប្រចណ្ឌប្រពន្ធ។

ដោយឡែកនៅព្រឹកថ្ងៃទី ០៥ ខែតុលានេះសមត្ថកិច្ចនគរបាលបច្ចេកទេសបានទៅធ្វើកោសល្យវិច័យសពទាំងពីរនាក់ប្ដីប្រពន្ធហើយក៏បានប្រគល់សពទៅក្រុមគ្រួសារដើម្បីធ្វើបុណ្យតាមប្រពៃណីនៅក្នុងមូលដ្ឋាន៕

អត្ថបទ៖ ឈៀងថារិទ្ធ