សន្តិសុខសង្គម

សមត្ថកិច្ចចម្រុះចុះបង្ក្រាបបទល្មើសនេសាទនៅចំណុចបឹងរៀល និងបានកាប់បំផ្លាញ ដុតកម្ទេចចោលរបាំងលបវែងៗ១៣របាំងប្រវែង២៦០០ម៉ែត្រ

បានផុស

១ year មុន

នៅ

ថ្ងៃព្រហស្បតិ៍ ១៩ តុលា ២០២៣

ដោយ

កំពង់ឆ្នាំង ៖ សមត្ថកិច្ចចម្រុះរួមមានកងរាជអាវុធហត្ថខេត្តកំពង់ឆ្នាំង សហការជា មួយមន្ត្រីជលផលផ្នែកកំពង់ឆ្នាំង អនុវត្តតាមការណែនាំដ៏ខ្ពង់ខ្ពស់របស់លោកស៊ុន សុវណ្ណារិទ្ធិ ប្រធានគណៈបញ្ជាការឯកភាពរដ្ឋបាលខេត្តនិងលោក ងិនហ៊ុន ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ឆ្នាំង នៅថ្ងៃ ទី១៩ ខែតុលា ឆ្នាំ២០២៣ បានចុះបង្ក្រាបបទល្មើសនេសាទដាក់របាំងលបសាច់អួនវែងៗខុសច្បាប់ចំនួន១៣របាំងមានប្រវែង២៦០០ម៉ែត្រ ស្ថិតនៅក្នុងឃុំកំពង់អូស ស្រុកជ្រុលគិរី ខេត្តកំពង់ឆ្នាំង។

លោកវរសេនីយ៍ឯក ហង្ស សុជាតិ មេបញ្ជាការរងកងរាជអាវុធហត្ថខេត្តកំពង់ ឆ្នាំង និងលោក បាន សុវណ្ណារិទ្ធ មន្ត្រីផ្នែកជលផលកំពង់ឆ្នាំងជាអ្នកដឹកនាំក្រុមសមត្ថកិច្ចចម្រុះបានឲ្យដឹងថា កិច្ចប្រតិបត្តិការបង្ក្រាបបទល្មើសនេសាទនៅចំណុចខាងលើនេះ មានកម្លាំងសរុបចំនួន ៣២ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មធ្យោបាយមាន កាណូតបាលាស្មាច់ចំនួន ៦គ្រឿង។ ក្នុងនោះមានកម្លាំងកងរាជអាវុធហត្ថខេត្តនិងស្រុកចំនួន ២៤ នាក់។ មានកាណូតបាល់អាស្មាច់ចំនួន ៤ គ្រឿងនិងមន្ត្រីជលផលផ្នែកកំពង់ឆ្នាំងនិងសង្កាត់នេសាទប្រឡាយមាសចំនួន ៨នាក់មានបាស្មាច់ចំនួន ២ គ្រឿង។

កិច្ចប្រតិបត្តិការខាងលើនេះ បានចាប់ដំណើរការបង្ក្រាបបទល្មើសពីម៉ោង៨និង ៣០ នាទីព្រឹករហូតដល់ម៉ោង៣ រសៀលនៅចំណុចបឹងរៀល ស្ថិតនៅក្នុងឃុំកំពង់អុស ស្រុកជល់គីរី ជាលទ្ធផលគឺ រុះរើកាប់បំផ្លាញ និងដុតកម្ទេចចោលនៅហ្នឹងកន្លែង របាំងលបវែងៗចំនួន ១៣ កន្លែង មានប្រវែង ២៦០០ម៉ែត្រ, លបលូចំនួន ២៥ មាត់ ,បង្គោលចំនួន ១.០៥០ ដើម ,ចាក់លែងត្រីចំណុះចំនួន ១៧០ គីឡូចូលក្នុងបឹងធម្មជាតិវិញ។

សូមបញ្ជាក់ថា នៅចំណុចខាងលើនេះ កាលពីថ្ងៃទី២៥ ខែកញ្ញា ឆ្នាំ២០២៣ សមត្ថកិច្ចនគរបាលបង្ក្រាបបទល្មើសសេដ្ឋកិច្ចខេត្តកំពង់ឆ្នាំង មានចំនួន ២៤ នាក់ កាណូត ៦ គ្រឿង បានចុះបង្ក្រាបម្ដងរួចមកហើយ ដោយបានកាប់បំផ្លាញរបាំងលោកវែងៗចំនួន ៨ របាំង មានប្រវែង ៤០០០ ម៉ែត្រ, លបលូ ៣០ មាត់និងចាក់លែងត្រីចំនួន៨០០គីឡូ ចូលក្នុងបឹងធម្មជាតិវិញ។ ប៉ុន្តែមកដល់ថ្ងៃនេះនៅចំណុចខាង លើនេះនៅតែមានបទល្មើសដាក់របាំងវែងៗមួយខ្សែមួយខ្សែរាប់ពាន់ម៉ែត្រដដែល។

ទាក់ទងនឹងករណីនេះលោក ងិន ហ៊ុនប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំងនៅល្ងាចថ្ងៃទី១៩ខែតុលានេះបានថ្លែងថ្លែងអំណរគុណយ៉ាងជ្រាលជ្រៅដល់សមត្ថកិច្ចនគរបាលខេត្ត និងកងរាជអាវុធហត្ថខេត្ត ដែលកន្លងមកតែងតែសហការជាមួយមន្ត្រីជំនាញចុះបង្ក្រាបបទល្មើសនេសាទនៅក្នុងភូមិសាស្ត្រខេត្តកំពង់ឆ្នាំងជាបន្តបន្ទាប់នឹងទទួលបានលទ្ធផលល្អ។

ដោយឡែកលោកប្រធានមន្ទីរបានណែនាំនិងផ្ដាំផ្ញើ ដល់មន្ត្រីជលផលទាំងលោក នាយខណ្ឌ លោកនាយផ្នែក និងនាយសង្កាត់ ព្រមទាំងមន្ត្រីជលផលទាំងអស់ត្រូវយកចិត្តទុកដាក់ចុះបង្ក្រាបបទល្មើសនេសាទនៅក្នុងដែនសមត្ថកិច្ចដែលខ្លួនទទួលខុសត្រូវ ជាប្រចាំ ដោយមិនត្រូវបណ្ដែតបណ្ដោយឲ្យកើតមានបទល្មើសនេសាទច្រើននោះឡើយ។ ករណីដែលមានបទល្មើសនេសាទច្រើនមិនចុះបង្ក្រាបនៅក្នុងដែនសមត្ថកិច្ច ផ្នែកឬសង្កាត់ណា មួយនោះ គឺលោកនាយផ្នែក លោកនាយសង្កាត់និងនាយខណ្ឌ ត្រូវតែទទួលខុស ត្រូវចំពោះមុខច្បាប់។ ព្រោះលោកប្រធានមន្ទីរបានណែនាំជាច្រើន លើកច្រើនសាររួចមកហើយ៕

ដោយ ៖ ឈៀង ថារិទ្ធ