ឆក់ខ្សែ ក បានសម្រេច ជនរងគ្រោះដេញតាមចាប់បានព្រួតវាយទ្រោមខ្លួន

ជនសង្ស័យម្នាក់ជិះម៉ូតូធ្វេីសកម្មភាពឆក់ខ្សែ ក មាសពីបុរសម្នាក់បានសម្រេចតែត្រូវបានជនរងគ្រោះដេញតាមចាប់បានមកវិញបង្កការភ្ញាក់ផ្អេីលកាលពីវេលាម៉ោង៦និង២០នាទីព្រឹកថ្ងៃទី២៤ ខែតុលា ឆ្នាំ២០២៣ នៅចំណុចមុខផ្ទះលេខ៨១ ផ្លូវលេខ៥៩៨ ក្រុមទី២៥ ភូមិ៥ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ជនសង្ស័យមានឈ្មោះ សុខា សុវណ្ណមុន្នីឆេង ហៅ ឆេង ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ (មានសារធាតុញៀន)។ ជនរងគ្រោះឈ្មោះ សៅ ណេត ភេទប្រុស អាយុ២៧ឆ្នាំ។ ខ្សែ ក មាសដែលជនសង្ស័យឆក់យកនោះមានទម្ងន់៥ជី។

តាមប្រភពព័ត៌មានបានឱ្យដឹងថា មុនពេលកេីតហេតុជនរងគ្រោះជិះម៉ូតូតាមបណ្តោយផ្លូវលេ៥៩៨ ខណៈមកដល់ចំណុចកេីតហេតុស្រាប់តែមានជនសង្ស័យម្នាក់ជិះម៉ាក Honda Scoopy ស៊េរី2022 ពណ៍ស ពាក់ផ្លាកលេខ ភ្នំពេញ 1JN-3771 មកពីក្រោយធ្វេីសកម្មភាពឆក់ទាញយកខ្សែកពីជនរងគ្រោះបានសម្រេចហេីយព្យាយាមគេចខ្លួន។ ភ្លាមនោះជនរងគ្រោះក៏បានជិះដេញតាមក្រោយ និងស្រែកថាចោរៗផ្អេីលដល់អ្នកដំណេីរចាប់បានភ្លាមៗ និងវាយម្នាក់មួយដៃមួយជេីងទ្រោមខ្លួនរួចប្រគល់ជូនសមត្ថកិច្ច។ ចំណែកខ្សែកមាសត្រូវបានធ្វើការប្រគល់ជូនជនរងគ្រោះវិញ តាមការស្នើសុំ។

ជនសង្ស័យខាងលើកំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងចាត់ការបន្តតាមនីតិវិធី៕

អត្ថបទ៖ សុខា