ឆេះយានដ្ឋានជួសជុលរថយន្ដមួយកន្លែងបំផ្លាញរថយន្ដ៦គ្រឿង និងសម្ភារមួយចំនួន

អគ្គិភ័យបានលេបត្របាក់យានដ្ឋានជួសជុលរថយន្ដមួយកន្លែងក្នុងខេត្តកំពង់ស្ពឺ ឆេះបំផ្លាញរថយន្ដចំនួន៦គ្រឿង និងសម្ភារមួយចំនួន។ ការណីគ្រោះអគ្គិភ័យនេះបានកើតឡើងកាលពីវេលាម៉ោង១២និង៤៥នាទីរំលងអាធ្រាត្រ ឈានចូលថ្ងៃទី១ ខែវិច្ឆិកា ឆ្នាំ២០២៣​ ស្ថិតនៅចំណុចភូមិអូរវែង ឃុំកាហែង ស្រុកសំរោងទង ខេត្តកំពង់ស្ពឺ។

របាយការណ៍របស់ស្នងការដ្ឋាននគរបាលខេត្តកំពង់ស្ពឺបានឲ្យដឹងថា យានដ្ឋានដែលត្រូវអគ្គិភ័យឆាបឆេះនេះមានទំហំ ២០ គុណ ៣៤ម៉ែត្រ ធ្វើពីដែក ជញ្ជាំងស័ង្កសី ដំបូលស័ង្កសី ដែលមានម្ចាស់ឈ្មោះ មុយ ចាន់ណារី ភេទប្រុស អា​យុ៤១ឆ្នាំ ប្រពន្ធឈ្មោះ ឪ ស្រីនោ អាយុ៣៩ឆ្នាំ រស់នៅភូមិកើតហេតុ​ ជាម្ចាស់​ឃ្លាំងនិងម្ចាស់ទីតាំង។

ក្នុងករណីអគ្គិភ័យនេះ បានបណ្ដាលឲ្យខូចខាតរថយន្ដសរុបចំនួន៦គ្រឿង មានរថយន្ដ Lexus 470 ចំនួន១គ្រឿង រថយន្ដ Ford Ranger pickup ចំនួន២គ្រឿង រថយន្ដ Land Cruiser ចំនួន២គ្រឿង និងរថយន្ដដឹកទំនិញចំនួន១គ្រឿង (ឆេះមួយផ្នែកខាងស្ដាំ) និងឆេះសម្ភារៈប្រើប្រាស់ក្នុងរថយន្ដមួយចំនួនទៀត តែមិនបណ្ដាលឲ្យមានអ្នករងរបួសនោះទេ។

របាយការណ៍សមត្ថកិច្ចបញ្ជាក់ថា ករណីនេះបណ្តាលមកពីឆ្លងចរន្ដអគ្គិសនីក្នុងរថយន្ដ ព្រោះរថយន្ដដែ​លដាក់តាំងលក់នោះជាប្រភេទរថយន្ដជួសជុលផង​ រថយន្ដលក់ផង​(មួយទឹក)​។ ក្នុងការជួយសង្គ្រោះ កម្លាំងសមត្ថកិច្ចបានប្រើប្រាស់រថយន្ដសង្រ្គោះអគ្គិភ័យ​ចំនួន០៦គ្រឿង​ និងប្រើទឹកអស់០៧រថយន្ត​ ទើបគ្រប់គ្រងស្ថានការណ៍បានដោយមិនបណ្ដាលឲ្យឆេះរាលដាលទៅផ្ទះប្រជាពលរដ្ឋដែលក្បែរខាងឡើយ៕

អត្ថបទ៖ សុខុម