ចាប់ខ្លួនស្ត្រីវ័យ៣០ឆ្នាំម្នាក់ ក្រោយចាក់សម្លាប់ឪពុក ខណៈម្ដាយរងរបួសធ្ងន់

ស្ត្រីម្នាក់បានយកកាំបិតចាក់ទៅលើឪពុកបង្កេីតខ្លួនឯងបណ្តាលឱ្យស្លាប់ក្នុងថ្លុកឈាម និងចាក់ម្តាយរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ចំណែកជនដៃដល់ត្រូវបានសមត្ថកិច្ចឃាត់ខ្លួនយកទៅសួរនាំ។

ហេតុការណ៍នេះបង្កការភ្ញាក់ផ្អេីលកាលពីវេលាម៉ោង១៧និង៥០នាទី ថ្ងៃទី៤ ខែវិច្ឆិកា ឆ្នាំ២០២៣ នៅក្នុងបុរីម៉ន ដានី ផ្ទះលេខB44 ផ្លូវលេខ៤ ភូមិតាអិន សង្កាត់ស្នោរ ខណ្ឌកំបូល រាជធានីភ្នំពេញ។

ជនរងគ្រោះជាឳពុកដែលបាត់បង់ជីវិតឈ្មោះ លៀង ម៉េងលាភ អាយុ៦០ឆ្នាំ មុខរបរមន្រ្ដីរាជការ និងម្តាយដែលរងរបួសធ្ងន់ឈ្មោះ ឈន មួយហេង អាយុ៥៩ឆ្នាំ មុខរបបមេផ្ទះ បច្ចុប្បន្នស្នាក់នៅបុរីម៉ន ដានី គម្រោងទី១០ ភូមិតាអីន សង្កាត់ស្នោរ ខណ្ឌកំបូល រាជធានីភ្នំពេញ។

ជនសង្ស័យឈ្មោះ លៀង ហែមវត្តី ហៅ ល័ក្ខ ភេទស្រី អាយុ៣០ឆ្នាំ មុខរបរនៅផ្ទះ បច្ចុប្បន្នស្នាក់នៅបុរីម៉ន ដានី គម្រោងទី១០ ភូមិតាអិន សង្កាត់ ស្នោរ ខណ្ឌកំបូល រាជធានីភ្នំពេញ ត្រូវជាកូនជនរងគ្រោះ។

តាមប្រភពព័ត៌មានបានឱ្យដឹងថា មុនពេលកើតហេតុជនសង្ស័យជាកូនបានចង់ចេញពីក្នុងផ្ទះ តែម្ដាយបានឃាត់មិនឲ្យចេញនោះទេ ពេលឃើញដូចនេះ ឪពុកក៏ជួយឃាត់ក៏ត្រូវកូនស្រីស្ទុះទៅយកកាំបិត ចាក់មកលើឪពុកម្តាយ ជាច្រើនកាំបិត បណ្តាលឱ្យឪពុកស្លាប់ក្នុងថ្លុកឈាម ចំណែកម្តាយរបួសធ្ងន់ ។

បច្ចុប្បន្នត្រូវបានសមត្ថកិច្ចឃាត់ខ្លួនបាន បន្ទាប់ពីជនសង្ស័យបានព្យាយាមរត់ទៅពួននៅជិតផ្ទះអ្នកជិតខាង៕

អត្ថបទ៖ សុខា