នគរបាលក្រុងប៉ោយប៉ែត បង្ក្រាបទីតាំងខារ៉ាអូខេ ឃាត់ខ្លួនជនសង្ស័យប្រើប្រាស់ថ្នាំញៀនជាង១រយនាក់

នគរបាលក្រុងប៉ោយប៉ែត កាលពីវេលាម៉ោង២៣:៥០នាទី យប់ថ្ងៃទី០៤ ខែវិច្ឆិកា ឆ្នាំ២០២៣ ថ្មីៗនេះ បើកប្រតិបត្តិការឆ្មក់ចូលបង្ក្រាបទីតាំងខារ៉ាអូខេមួយកន្លែងយីហោ SKY KTV នៅភូមិអូរជ្រៅ សង្កាត់អូរជ្រៅ ក្រុងប៉ោយប៉ែត ឃាត់ខ្លួនសង្ស័យចំនួន១០៧នាក់ ពាក់ព័ន្ឌករណីលក់ចែកចាយ និងប្រើប្រាស់ថ្នាំញៀន។ នេះបើតាមការផ្សព្វផ្សាយដោយស្នងការនគរបាលខេត្តបន្ទាយមានជ័យតាមទំព័រហ្វេសប៊ុក នៅល្ងាចថ្ងៃទី០៦ ខែវិច្ឆិកានេះ។

ទំព័រហ្វេសប៊ុកបានឱ្យដឹងថា អនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ លោកវរសេនីយ៍ឯក សៅ សារឿន អធិការនៃអធិការដ្ឋាននគរបាលក្រុងប៉ោយប៉ែត បានដឹកនាំកម្លាំងចុះបង្ក្រាបទីតាំងខារ៉ាអូខេ ដែលសង្ស័យថាមានការចែកចាយ និងប្រើប្រាស់គ្រឿងញៀន ។

ជាលទ្ធផលក្នុងប្រតិបត្តការនេះនគរបាលក្រុងប៉ោយប៉ែត ឃាត់ខ្លួនបានជនសង្ស័យចំនួន១០៧នាក់ ជនសង្ស័យភេទស្រី ចំនួន៤០នាក់។ ក្នុងនោះមានជនបរទេសចំនួន៤២នាក់ ភេទស្រី០៧នាក់ រួមមាន៖ ជនជាតិឥណ្ឌូនេស៊ីចំនួន២១នាក់ មានភេទស្រី០១នាក់ ជនជាតិវៀតណាមចំនួន១៥នាក់ ភេទស្រី០២នាក់ ជនជាតិចិនចំនួន០៣នាក់ មានភេទស្រី០១នាក់ និងជនជាតិថៃៈ០៣នាក់ ស្រី០៣នាក់។

ក្នុងការឆ្មក់បង្រាបនេះ សមត្ថកិច្ចជំនាញដកហូតបានម្សៅម៉ត់សថ្លា ០៦កូនថង់ និង០១កូនថង់តូច,ថ្នាំកញ្ចប់ពណ៌ក្រហម(រូបសេះ)០១កញ្ចប់, ពណ៌ក្រហម (រូបទំពាំងបាយជូរ) ០១កញ្ចប់,ពណ៌លឿង ១០កញ្ចប់,ពណ៌ទឹកក្រូច០១កញ្ចប់ និងកញ្ចប់ថ្នាំពណ៌ក្រហមអក្សរ(L V)០១កញ្ចប់។

សូមបញ្ជាក់ថា គិតត្រឹមថ្ងៃទី០៦ ខែវិច្ឆិកា ឆ្នាំ២០២៣នេះ ទីតាំងខារ៉ាអូខេSKY KTV ត្រូវបានបិទបណ្តោះអាសន្ន។ រីឯជនសង្ស័យប្រុស-ស្រីទាំងនេះ ត្រូវបាននគរបាលឃាត់ខ្លួនសួរនាំ និងធ្វើតេស្តរកសារធាតុញៀន ដើម្បីចាត់ការបន្តតាមនីតិវិធី៕