ឃាត់ខ្លួនជនជាតិចិន២នាក់ រកឃើញថ្នាំញៀនជាង២៧០កញ្ចប់

កម្លាំងសមត្ថកិច្ចចម្រុះក្រុងព្រះសីហនុ បានឃាត់ខ្លួនជនសង្ស័យជនជាតិចិនចំនួន២នាក់ ឆែករកឃើញម្សៅកញ្ចប់សង្ស័យជាគ្រឿងញៀនជាង២៧០កញ្ចប់ និងវត្ថុតាងមួយចំនួនទៀត។

 បើតាមប្រភពពីសមត្ថកិច្ច ដើមឡើយកម្លាំងសមត្ថកិច្ចបានឃាត់ខ្លួនជនសង្ស័យទីមួយដែលមានឈ្មោះថា Song JingGenភេទប្រុស ឆ្នាំកំណេីត ១៩៩៤ ជនជាតិចិន  មុខរបរមិនពិតប្រាកដ មានទីលំនៅបច្ចុប្បន្ន : ភូមិ២ សង្កាត់៤ ក្រុង/ខេត្តព្រះសីហនុ ខណៈពេលដែលគេបើករថយន្ត ឆ្លងកាត់គោលដៅត្រួតពិនិត្យ ឆែកឆេរស្វែងរកបទល្មើសកាលពីម៉ោង០និង៣០នាទីយប់ឈានចូលថ្ងៃទី២៣ ខែវិច្ឆិកា ឆ្នាំ២០២៣ ចំនុចនៅលើផ្លូវឯករាជ្យស្ថិតនៅភូមិ១ សង្កាត់លេខ៤ក្រុង/ខេត្តព្រះសីហនុ។ ក្រោមឃាត់ខ្លួនភ្លាមៗ សមត្ថកិច្ចបានឆែកឆេររកឃើញក្នុងរថយន្តជនជាតិចិននោះ មាននូវគ្រឿងញៀនជាច្រើនកញ្ចប់។

ខណៈពេលកំពុងតែឆែកឆេរជនសង្ស័យទីមួយ   ក៏មានគូរកនរបស់ជនសង្ស័យជនជាតិចិនម្នាក់ទៀតឈ្មោះ SHEN ZHEN HOU ភេទប្រុស ឆ្នាំកំណើត ១៩៨៤ ជនជាតិចិន មុខរបរ អ្នកគ្រប់គ្រងបន្ទប់ខេធីវី មកមើល និងសួរនាំ ស្របពេលជាមួយគ្នានោះសមត្តកិច្ចក៏មានការសង្ស័យ ដោយភ្លាមៗសមត្ថកិច្ចបានឆែកឆេរក្នុងទូរស័ព្ទដៃជនជាតិចិនទីពីរនោះ។ ក្រោយការឆែកឆេរលើជនសង្ស័យទីពីរ សមត្ថកិច្ចសន្ថិដ្ឋានថា ជនសង្ស័យទាំងពីរមានការពាក់ព័ន្ធជាមួយគ្នា។ សមត្ថកិច្ច  ក៏បន្តសាកសួរស្រាវជ្រាវរកឃេីញថាជនសង្ស័យ ស្នាក់នៅសណ្ឋាគារ  Brown Hotel។ ក្រោយដឹងពីទីកន្លែងស្នាក់នៅ សមត្ថកិច្ចជំនាញ  បានទៅឆែកឆេរបន្ទប់របស់ជនសង្ស័យទាំងពីរ  ក៏រកឃេីញគ្រឿងញៀននៅក្នុងបន្ទប់របស់ជនសង្ស័យចំនូនជាង២៧០កញ្ចប់។

ក្នុងប្រតិបត្តិការនេះ សមត្ថកិច្ចបានឆែកឆេររកឃើញ       ម្សៅសៅកញ្ចប់ពណ៌ក្រហមភ្ជាប់ជាមួយម៉ាកសញ្ញា Ferrari ដែលសង្ស័យជាសារធាតុញៀន ចំនួន ២០០ កញ្ចប់, ម្សៅក្រាមពណ៍សសង្ស័យសារធាតុញៀនចំនួន១៣កញ្ចប់,ម្សៅកញ្ចប់ពណ៍ក្រហមអក្សរ Grape សង្ស័យសារធាតុញៀនចំនួន៣៩កញ្ចប់, ម្សៅកញ្ចប់ពណ៏ក្រហមអក្សរ Ferrari សង្ស័យសារធាតុញៀនចំនួន០៤កញ្ចប់,ម្សៅកញ្ចប់រូបតុក្តាអក្សរ Jintiao សង្ស័យសារធាតុញៀនចំនួន១៥កញ្ចប់,ម្សៅកញ្ចប់ពណ៏ត្នោតរូបនាគសង្ស័យសារធាតុញៀនចំនួន០១កញ្ចប់,ម្សៅក្រាមពណ៏សសង្ស័យសារធាតុញៀនចំនួន០១ស្បោង,កញ្ឆាក្រៀម ០១ កញ្ចប់,ជញ្ជីងសម្រាប់ថ្លឹងគ្រឿងញៀនចំនួន ០២ គ្រឿង,សម្ភារៈសម្រាប់វេចខ្ចប់ និងសម្ភារៈសម្រាប់ប្រើប្រាស់គ្រឿងញៀនមួយចំនួនធំ, លិខិតឆ្ឆងដែនឈ្មោះ SHEN Zhenzhou ចំនួន០១ច្បាប់, ទូរស័ព្ទ និងរថយន្តចំនួន០១ គ្រឿង។

បច្ចុប្បន្នជនសង្ស័យខាងលេីកំពុងឃាត់ខ្លួននៅអធិការដ្ឋាននគរបាលក្រុងព្រះសីហនុ ដេីម្បីធ្វេីការសាកសួរ និង ចាត់ការតាមនិតិវិធីបន្ត។

គួរឱ្យដឹងថា នៅរសៀលថ្ងៃទី២៣ខែវិច្ឆិកា ឆ្នាំ២០២៣ លោកគួច ចំរើន អភិបាលខេត្តព្រះសីហនុ អមដំណើរដោយស្នងការនគរបាលខេត្តព្រះសីហនុនិងមននត្រីកងរាជអាវុធហត្ថក្រុង /ខេត្ត  និងមន្ត្រីក្រោមឱវាទជាច្រើននាក់ផ្សេងទៀត ទៅពិនិត្យមើលវត្ថុតាងបទល្មើសនិងជនសង្ស័យនៅស្នងការដ្ឋានគរបាលខេត្តព្រះសីហនុ៕

អត្ថបទដោយ៖ ស៊ុយ ចាន់ធា