ចាក់បុរសម្នាក់បណ្តាលឱ្យបាត់បង់ជីវិតសង្ស័យគំនុំ

ជនសង្ស័យមិនស្គាល់មុខចាក់បុរសម្នាក់ដេកស្លាប់ក្នុងថ្លុកឈាម មួយកាំបិតចំពីក្រោយខ្នងចំហៀងស្មាខាងឆ្វេង  សង្ស័យរឿងគំនំ។

ករណីឃាតកម្មនេះ បានបង្កការភ្ញាក់ផ្អើលដល់ប្រជាពលរដ្ឋ និងអ្នកដំណើរនៅវេលាម៉ោង៤ទៀបភ្លឺឈានចូលថ្ងៃទី១០ ខែធ្នូ ឆ្នាំ២០២៣  នៅលើផ្លូវបេតុង  កែងផ្លូវលេខ ២៧១ ក្បែរគល់ស្ពានអាកាសស្ទឹងមានជ័យ ក្នុងសង្កាត់បឹងសាឡាង ខណ្ឌទួលគោក  រាជធានីភ្នំពេញ។

សមត្ថកិច្ច បានឱ្យដឹងថា  សពជនរងគ្រោះមានឈ្មោះ កន វឿន ភេទប្រុស អាយុ២៩ឆ្នាំ បច្ចុប្បន្នស្នាក់នៅបន្ទប់ជួល ជាមួយគ្រួសារ ក្នុងសង្កាត់ស្ទឹងមានជ័យទី១ ខណ្ឌមានជ័យ។

តាមប្រភពព័ត៌មានបានឱ្យដឹងថា មុនពេលកើតហេតុនៅវេលាម៉ោងប្រមាណជា៤ទៀបភ្លឺឈានចូលថ្ងៃទី១០  ខែធ្នូ ឆ្នាំ២០២៣  មានប្រជាពលរដ្ឋដើរហាត់ប្រាណ  ខណៈដើរ

មកដល់ក្បែរកន្លែងកើតហេតុ ក៏ក្រឡេកឃើញបុរសរងគ្រោះបានដេកដួលផ្កាប់មុខក្នុងថ្លុកឈាម  ទើបមានការ ភ្ញាក់ផ្អើលដល់ប្រជាពលរដ្ឋ និងអាជ្ញាធរចុះទៅពិនិត្យមើលជនរងគ្រោះឃើញថា បានដាច់ខ្យល់ស្លាប់បាត់ទៅហើយ។

សមត្ថកិច្ចមូលដ្ឋានប៉ុស្ដិ៍នគរបាលរដ្ឋបាលសង្កាត់បឹងសាឡាង បានចុះមកដល់ទីតាំងកើតហេតុហើយ យកខ្សែហ៊ុមព័ទ្ធជុំ វិញទីតាំងសព  រួចក៏ទាក់ទងទៅខាងជំនាញកោសល្យវិច័យ របស់ស្នងការដ្ឋាននគរបាលរាជធានីភ្នំពេញ បន្តដើម្បីឱ្យចុះ មកពិនិត្សសពបុរសរងគ្រោះ ។

ក្រោយពីកម្លាំងជំនាញពិនិត្យទៅលើសពរួច បានបញ្ជាក់ថា សពបុរសរងគ្រោះត្រូវបានគេចាក់មួយ កាំបិតចំពីក្រោយ ខ្នងចំហៀងស្មាខាងឆ្វេងទើបបណ្ដាលឱ្យស្លាប់  ហើយករណីខាងលើនេះគឺជាករណីឃាតកម្ម ដោយជនសង្ស័យ មិនស្គាល់មុខបានចាក់សម្លាប់ជនរងគ្រោះ។ ក្នុងករណីនេះ  សមត្ថកិច្ចបានឱ្យគ្រួសារជនរង គ្រោះដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាលសង្កាត់បឹងសាឡាង ដើម្បីឱ្យសមត្ថកិច្ចធ្វើការស្រាវជ្រាវរកឃាតក ដើម្បីយកមក ចាត់ការទៅតាមច្បាប់៕

អត្ថបទ  ៖  សុខា