ទំនាស់ក្នុងគ្រួសារ កូនចុងចាក់សម្លាប់ឪពុកស្លាប់ភ្លាមៗ នៅកន្លែងកើតហេតុ

បុរសវ័យចំណាស់ម្នាក់បានបាត់បង់ជីវិតភ្លាមៗ បន្ទាប់ពីត្រូវកូនចុងប្រើកាំបិតចិតបន្លែចាក់ជាច្រើនកាំបិត រួចគេចខ្លួនបាត់បន្ទាប់ពីមានទំនាស់ក្នុងគ្រួសារបន្តិចបន្ទួចរួចមក។

យោងតាមរបាយការណ៍របស់សមត្ថកិច្ចបានបញ្ជាក់ថា ករណីឃាតកម្មនេះបានកើតឡើងនៅវេលាម៉ោងជិត៧យប់ ថ្ងៃទី១៣ ខែធ្នូ ឆ្នាំ២០២៣ ត្រង់ចំណុចក្រុមទី៩ ភូមិសាមគ្គី ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។

របាយការណ៍បានបន្តថា ករណីឃាតកម្មនេះ គឺបង្កឡើងដោយឈ្មោះ វណ្ណាវី វច្ចណ: ភេទប្រុស អាយុ៣០ឆ្នាំ រស់នៅភូមិសាមគ្គី ឃុំពេជ្រចិន្តា ស្រុកភ្នំព្រឹក (ត្រូវជាកូនចុង) បានធ្វើសកម្មភាពប្រើប្រាស់កាំបិតចិតបន្លែចាក់សម្លាប់លើជនរងគ្រោះឈ្មោះ ហៃ សុភក្រ្ត័ ភេទប្រុស អាយុ៦៥ឆ្នាំ រស់នៅភូមិ ឃុំ ជាមួយគ្នា (ត្រូវជាឪពុកចុង) បណ្តាលអោយស្លាប់នៅកន្លែង ។ 

ឆ្លងតាមការបំភ្លឺរបស់ក្រុមគ្រួសារបានអោយដឹងថា មូលហេតុឈានដល់ការចាក់សម្លាប់ជនរងគ្រោះខាងលើ គឺដោយសារ មានទំនាស់ក្នុងគ្រួសារ។ ហើយបច្ចុប្បន្ន សមត្ថកិច្ចនគរបាលជំនាញកំពុងស៊ើបអង្កេតស្រាវជ្រាវស្វែងរកជនសង្ស័យ ដើម្បីយកមកផ្តន្ទាទោសតាមផ្លូវច្បាប់៕

អត្ថបទ៖ សោ និយមរ័ត្ន