សន្តិសុខសង្គម

សមត្ថកិច្ចកំពុងស្វែងរកជនសង្ស័យ២នាក់ ចូលហាងផឹកស៊ីមិនចេញលុយហើយ ថែមទាំងលួចទូរសព្ទ

បានផុស

៩ ខែ មុន

នៅ

ថ្ងៃសុក្រ ១៥ ធ្នូ ២០២៣

ដោយ

បាត់ដំបង ៖ បន្ទាប់ពីសមត្ថកិច្ចទទួលបានពាក្យបណ្ដឹងពីម្ចាស់ហាងមួយកន្លែង ដែលមានទីតាំងស្ថិតនៅក្នុងភូមិជ្រៃកោង សង្កាត់ស្លាកែត ក្រុងបាត់ដំបង ថាមានជនសង្ស័យ២នាក់ ចូលហាងផឹកស៊ីមិនឱ្យលុយ ហើយថែមទាំងលួចទូរសព្ទដៃទៀតនោះ ខណៈពេលនេះសមត្ថកិច្ចកំពុងកំណត់មុខសញ្ញា តាមស្រាវជ្រាវយ៉ាងសស្រោកសស្រាំ ដើម្បីតាមឃាត់ខ្លួនជនសង្ស័យទាំងនេះមកចាត់ការតាមនីតិវិធីច្បាប់។

បើតាមម្ចាស់ហាងរងគ្រោះបានរៀបរាប់ឱ្យដឹងថា កាលពីវេលាម៉ោង ប្រមាណ១០យប់ ថ្ងៃទី១២ ធ្នូ ឆ្នាំ២០២៣ មានក្រុមជនសង្ស័យបីនាក់ ប្រុសពីរនាក់ ស្រីម្នាក់ បានដឹកគ្នាមកច្រៀង និងផឹកស៊ី ក្នុងហាងរបស់គាត់ ហើយក្នុងចំណោមទាំងបីនាក់នោះ មានម្នាក់ជាអ្នកឌុប ខណៈពេលចូលតែមួយភ្លែតក៏ចេញទៅវិញបាត់ នៅសល់២នាក់ គឺស្រីមួយប្រុសមួយ។

បន្ទាប់មកទៀតពួកគេទាំងពីរនាក់ បានហៅម្ហូបជាច្រើនមុខ និងផឹកស៊ីយ៉ាងសប្បាយក្អាកក្អាយ រហូតដល់ម៉ោងជាង១២រំលងអធ្រាត្រឈានចូល ថ្ងៃទី១៣ធ្នូ។ ខណៈដែលកំពុង ផឹកស៊ីមិនទាន់គិតលុយផង ជនសង្ស័យជាបុរសបានដើរចេញពីក្នុងបន្ទប់ច្រៀងចុះមកក្រោម ស្របពេលនោះបុគ្គលិកហាងក៏មានការសង្ស័យ បានតាមឱ្យទៅលើបន្ទប់វិញ តែបុរសនោះតបថា ទៅមុនទៅ។ ឆ្លៀតពេលបុគ្គលិកទៅមុនបាត់ ឃើញឱកាសល្អជនសង្ស័យក៏ផ្លោះរបងគេចខ្លួនបាត់តែម្តង ទុកឱ្យនារីដែលមកជាមួយនៅតែឯង។

ដោយបាត់បុរសនោះយូរពេក ម្ចាស់ហាងបានឆែកកាមេរ៉ាសុវត្ថិភាព ទើបដឹងថា ជាក្រុមចោរធ្វើសកម្មភាពលួចរត់ ហើយថែមទាំងបានលួចទូរសព្ទដៃទំនើបមួយគ្រឿង របស់បុគ្គលិកហាងដែលទុកលើតុទៀតផង។

ចំណែកស្ត្រីដែលមកជាមួយ បាននិយាយថា នាងឈ្មោះ អ៊ីលាង ជួលផ្ទះនៅម្តុំ កាប់គោ មានមុខរបរដើររកស៊ីតាមសួនពេលយប់។ នាងបន្តថា បុរសពីរនាក់នោះ ម្នាក់ឈ្មោះ ម៉ាប់ (ជាអ្នកឌុប) ហើយម្នាក់ទៀត ដែលចេញតាមក្រោយ ដោយផ្លោះរបងនោះទើបតែស្គាល់ពេលនាំខ្លួនមកផឹកស៊ីនៅហាងនេះទេ ហើយក៏ទុកនាងចោលបែបនេះតែម្តង។

ស្ត្រីរូបនេះបន្តប្រាប់ម្ចាស់ហាងថា ខ្លួនស្គាល់បុរសម្នាក់ឈ្មោះ ម៉ាប់ នោះ ដោយសារតែបុរសនេះតែងនាំ នារីតាមសួនទៅដេកជាញឹកញាប់។ ក្រោយម្ចាស់ហាងសួរនាំរួច ក៏បានឱ្យស្ត្រីនោះទៅផ្ទះវិញ និង បានដាក់ពាក្យបណ្តឹងទៅកាន់សមត្ថកិច្ច នៃស្នងការនគរបាលខេត្តបាត់ដំបង។

ក្រោយពីទទួលបានពាក្យបណ្ដឹង សមត្ថកិច្ចបានកំណត់មុខសញ្ញាក្រុមនេះខ្លះៗហើយ ដោយសមត្ថកិច្ចបានអះអាងថា ក្រុមខាងលើនេះធ្លាប់ធ្វើសកម្មភាពបែបនេះជាច្រើនហាងមកហើយ។ ពេលនេះសមត្ថកិច្ចកំពុងតាមស្រាវជ្រាវ ដើម្បីចាប់ជនសង្ស័យចាត់ការទៅតាមនីតិវិធីច្បាប់៕

ដោយ ៖ សៅ សារិទ្ធ