អគ្គិភ័យឆេះរោងចក្រក្តារបន្ទះ ខូចខាតសម្ភារៈសរុបជាទឹកប្រាក់ប្រហែល៦ម៉ឺនដុល្លារ​

រោងចក្រផលិតក្តារបន្ទះរបស់ក្រុមហ៊ុន​ ហ៊ាង សេងហ៊ាត់ ស្ថិតនៅភូមិជីមាន់ជើង ឃុំក្រែក ស្រុកពញាក្រែក ខេត្តត្បូងឃ្មុំ ត្រូវវបានអគ្គិភ័យឆាបឆេះយ៉ាងសន្ធោសន្ធៅខូចខាតសម្ភារៈមួយចំនួនធំសរុបទឹកប្រាក់ប្រហែល៦០០០០ដុល្លារ​។

យោងតាមរបាយការណ៍របស់ស្នងការដ្ឋាននគរបាលខេត្តត្បូងឃ្មុំ បានឲ្យដឹងថា ករណីអគ្គិភ័យនេះបានកើតឡើងកាលពីវេលាម៉ោង០៣និង១៥នាទីទាបភ្លឺ ថ្ងៃទី០១ ខែមករា ឆ្នាំ២០២៤ និងត្រូវបានកម្លាំងនគរបាលស្រុកពញាក្រែក​ ស្រុកមេមត់​ ស្រុកតំបែរ និងរថយន្តពន្លត់អគ្គីភ័យនៃស្នងការដ្ឋាននគរបាលខេត្តត្បូងឃ្មុំ បានចេញជួយអន្តរាគមន៍ចុះទៅដល់កន្លែងកើតហេតុបាញ់ទឹកពន្លត់ដោយប្រើប្រាស់រថយន្តពន្លត់អគ្គិភ័យអស់ចំនួន៤គ្រឿង ប្រើប្រាស់ទឹកអស់ចំនួន២៥ឡានស្មើនឹង​១៥០​ម៉ែត្រគូប ទើបគ្រប់គ្រងស្ថានការណ៍បាន។

បើតាមរបាយការណ៍សម្ភារខូចខាតមាន សាស័រចំនួន១គ្រឿង ឡចំហុយចំនួន​២កន្លែង ក្តារបន្ទះកែច្នៃ ចំនួ​ន​១០០​គីប ឡដុតយកចំហាយទឹកចំនួន០១កន្លែង និងសម្ភារ:ផ្សេងៗមួយចំនួនទៀត សរុបជាទឹកប្រាក់ប្រហែល ៦០០០០ដុល្លារ​។ ករណីអគ្គិភ័យនេះសមត្ថកិច្ចបានបញ្ចាក់ថា មូលហេតុគឺបណ្តាលមកពីឆ្លងចរន្ដអគ្គិសនី៕