នាយកដ្ឋាននគរបាលព្រហ្មទណ្ឌ សហការណ៍ជាមួយនគរបាល២ខេត្ត តាមចាប់ក្រុមចោរប្លន់២នាក់ក្នុងចំណោមបក្ខពួក៣នាក់

កម្លាំងជំនាញនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានសហការណ៍ជាមួយកម្លាំងនគរបាលនៃស្នងការដ្ឋាននគរបាលខេត្តសៀមរាប និងស្នងការនគរបាលខេត្តព្រះវិហារ ស្រាវជ្រាវឃាត់ខ្លួនជនសង្ស័យ២នាក់ ក្នុងចំណោមបក្ខពួក៣នាក់ ក្រោយធ្វើសកម្មភាពចូលភ្ជង់ប្លន់យកទ្រព្យសម្បត្តិពីប្រជាពលរដ្ឋមួយកន្លែងដល់ក្នុងផ្ទះ។

ប្រតិបត្តិការនេះបានធ្វើឡើងកាលពីថ្ងៃទី៣ ខែមករា ឆ្នាំ២០២៤ ដោយឃាត់បានជនសង្ស័យ២នាក់មានឈ្មោះ រ៉ង សារ៉ាត់ ភេទប្រុស អាយុ៣៣ឆ្នាំ ជនជាតិខ្មែរ ឃាត់ខ្លួនបាននៅចំណុចភូមិថ្នលដាច់ ឃុំដានរុណ ស្រុកសូនិគម ខេត្តសៀមរាប។ ឈ្មោះ ឈិន ភន ភេទប្រុស អាយុ៣៨ឆ្នាំ ជនជាតិខ្មែរឃាត់ខ្លួនបាននៅចំណុចភូមិស្នាផ្អែក ឃុំស្រយ៉ង ស្រុកគូលេន ខេត្តសៀមរាប និងដកហូតបានវត្ថុតាង ដែលយកមកធ្វើសកម្មភាពប្រព្រត្តិបទល្មើសបានមួយចំនួន។

ក្រោយពីឃាត់ខ្លួន ជនសង្ស័យទាំង២នាក់បានសារភាពថា ពួកខ្លួនមានបក្ខចំនួន៣នាក់ ពិតជាបានធ្វើសកម្មភាពចូលផ្ទះប្រជាពលរដ្ឋ និងប្រដាប់ដោយកាំបិតចូលភ្ជង់ប្លន់យកទ្រព្យសម្បត្តិប្រជាពលរដ្ឋពិតប្រាកដមែន។

ជនសង្ស័យត្រូវបានកម្លាំងនាយកដ្ឋាននគរបាលព្រហ្មទណ្ឌ ប្រគល់ឲ្យទៅស្នងការដ្ឋាននគរបាលខេត្តសៀមរាប បន្តអនុវត្តនីតិវិធី និងស្វែងរកចាប់ខ្លួនមុខសញ្ញាសង្ស័យឈ្មោះ ឈិន ភណ្ឌ ដែលកំពុងរត់គេចខ្លួនមកផ្ដន្ទាទោសតាមច្បាប់។

សូមបញ្ចាក់ថា កាលពីថ្ងៃទី២២ ខែធ្នូ ឆ្នាំ២០២៣ វេលាម៉ោង២១និង១៥នាទី ជនសង្ស័យមានគ្នា៣នាក់បានធ្វើសកម្មភាពប្រើកាំបិតចូលភ្ជង់ប្លន់យកទ្រព្យសម្បត្តិរបស់ប្រជាពលរដ្ឋមួយកន្លែងនៅចំណុចផ្ទះជនរងគ្រោះឈ្មោះ ឡិក វិច្ឆិកា ភេទស្រី អាយុ៣៣ឆ្នាំ មុខរបរលក់ដូរ ស្ថិតនៅភូមិត្រពាំងខ្ទះ(អូរប្រាំព្យាម) ឃុំស្វាយលើ ស្រុកស្វាយលើ ខេត្តសៀមរាប រួចនាំគ្នារត់គេចខ្លួនរហូតដល់ថ្ងៃទី៣ ខែមករា ឆ្នាំ២០២៤ ទើបកម្លាំងជំនាញស្រាវជ្រាវតាមចាប់ខ្លួនបានតែម្ដង៕

អត្ថបទ៖ សុខុម