មិនមានការចាប់ខ្លួនលោក នី ណាក់ នោះទេ

លោក នី ណាក់ ដែលមានអាខោនហ្វេសប៊ុកឈ្មោះ IMan KH មិនមានការចាប់ដូចការចុះផ្សាយនោះទេ នេះបើតាមការបញ្ជាក់ពីលោក ទូច សុខៈ អ្នកនាំពាក្យរងក្រសួងមហាផ្ទៃ បានប្រាប់កម្ពុជាថ្មី នៅរសៀលថ្ងៃទី៥ ខែមករា ឆ្នាំ២០២៤​នេះ។

លោក ទូច សុខៈ បានបញ្ជាក់ថា បន្ទាប់ពីបានឃើញការចុះផ្សាយព័ត៌មានពីការចាប់ខ្លួនលោក នី ណាក់ លោកបានទាក់ទងទៅខាងជំនាញនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិហើយ តែមិនមានការឃាត់ខ្លួន ឬក៏ចាប់ខ្លួនលោក នី ណាក់ ដូចការផ្សព្វផ្សាយនោះទេ។

លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ក៏បានបញ្ចាក់នៅរសៀលថ្ងៃទី៥​មករានេះដែរថា ខាងកម្លាំងនគរបាលនៃស្នងការនគរបាលរាជធានីភ្នំពេញ មិនមានការឃាត់ខ្លួនជនណាម្នាក់នោះទេ។

សូមជម្រាបថា យោងតាមអាខោនហ្វេសប៊ុកឈ្មោះ Synet S0k បានចែករំលែកពីការចាប់ខ្លួនលោក នី ណាក់ ដោយម្ចាស់អាខោនហ្វេសប៊ុកនេះបានសរសេរថា «បង នី ណាក់ មានរឿងហើយ ត្រូវបាន ហេង សួ ប្ដឹងពីបទ បរិហារកេរ្ដិ៍ និងញុះញង់ ពេលនេះគាត់ត្រូវបានសាកសួរនៅក្រសួងមហាផ្ទៃ គេនឹងបញ្ចូនគាត់ទៅតុលាការបន្តិចទៀតនេះ»៕

អត្ថបទ៖ សុខុម