ពលរដ្ឋស្នើអាជ្ញាធរ ជួយទប់ស្កាត់រថយន្តដឹកលើស ​ទម្ងន់បង្កឲ្យស្ពានបាក់ស្រុត

រថយន្តធុនធំដឹកដំឡូងមីលើសទម្ងន់បង្កឲ្យស្ពាន២កន្លែងនៅក្នុងភូមិអន្លង់ស្វាយ ឃុំអូរ៉ៃ ស្រុកថាឡាបរិវ៉ាត់បាក់ស្រុត ប្រជាពលរដ្ឋស្នើឱ្យអាជ្ញាធរពាក់ព័ន្ធជួយធ្វើការទប់ស្កាត់នឹងធ្វើការជួសជុលស្ពានឡើងវិញ ដើម្បីសម្រួលដល់ប្រជាពល​រដ្ឋដឹកកសិផលទៅកាន់ទីផ្សារ។

ប្រជាពលរដ្ឋបានឲ្យដឹងថា សព្វថ្ងៃនេះមានរថយន្តធុនធំតែងតែដឹកលើសទម្ងន់ដឹកឆ្លងកាត់ស្ពានចំនួន ២ កន្លែងក្នុង​ឃុំអូរៃទាំងយប់ទាំងថ្ងៃ បង្កឲ្យស្ពានដែកបាឡេនៅចំកណ្ដាលស្ពានបាក់ស្រុត ប្រជាពលរដ្ឋខំធ្វើការជួសជុលបណ្ដុះអាសន្នតែមិនអាចទ្រទ្រង់ទម្ងន់រថយន្តដែលផ្ទុកលើសនោះបានឡើយ។

ប្រជាពលរដ្ឋបានលើកឡើងទៀតថា ទោះជាស្ពានដែកនេះសង់រឹងមាំយ៉ាងណាក៏មិនអាចទ្រទ្រង់ និងការដឹកលើទម្ងន់របស់​​រថយន្តខ្នាតធំបានឡើយពេលដែលរថយន្តឆ្លងកាត់ម្ដងៗ ធ្វើឲ្យស្ពានរង្គើញ័ររហូតឈានដល់ការបាក់ស្រុតធ្ងន់ធ្ងរ​ថែមទៀត។

ពលរដ្ឋដែលរស់នៅភូមិឃុំខាងលើស្នើតដល់អាជ្ញាធរ និងអ្នកពាក់ព័ន្ធជួយធ្វើការទប់ស្កាត់រថយន្តដឹកលើទម្ងន់ និងធ្វើការជួសជុលស្ពានខូចនោះឡើងវិញផង ដើម្បីងាយស្រួលដល់កសិករដឹកកសិផលទៅកាន់ទីផ្សារ ហើយក៏ជារដូវកសិករប្រមូលផលដែរ។

ពាក់ព័ន្ធក្នុងករណីស្ពានខាងលើនេះលោក ស គឹមណាត ប្រធានមន្ទីរសាធារណៈការ និងដឹកជញ្ជូនខេត្តក៏បានឲ្យដឹងដែរថា ផ្លូវស្ពានមួយខ្សែក្រាលគ្រោះក្រហមដែលតភ្ជាប់ពីស្រុកថាឡាបរិវ៉ាត់ទៅស្រុកសៀមបូកតាមដងទន្លេមេគង្គគឺមិនស្ថិតនៅក្នុងការគ្រប់គ្រង ឬចំណាយរបស់មន្ទីរសាធារណការ និងដឹកជញ្ជូនខេត្តនោះទេ។

លោក ម៉ែន គង់ អ្នកនាំពាក្យសាលាខេត្តស្ទឹងត្រែងបានប្រាប់ថា ដើម្បីថែរក្សាទ្រព្យសម្បត្តិសាធារណៈឲ្យនៅបានល្អស្នើសុំទៅម្ចាស់យានយន្តដែលផ្ទុកលើសទម្ងន់ឬរថយន្តធុនធំទាំងអស់ត្រូវចូលរួមប្រើប្រាស់ផ្លូវកុំឲ្យដឹកលើសទម្ងន់ឆ្លងកាត់ជៀស​វាង​ការប្រើប្រាស់មិនបានយូរអង្វែង។

ដោយឡែកលោក សន សារឿន អភិបាលស្រុកថាឡាបរិវ៉ត់ក៏បានបញ្ជាក់ឲ្យដឹងដែរថា នៅចំពោះមុខលោកនឹងរៀបចំកម្លាំងធ្វើការជួសជុលស្ពានដែកនេះឡើងវិញ។

ស្ពានទាំងពីរកន្លែងនេះស្ថិតនៅក្នុងភូមិអន្លង់ស្វាយ ឃុំអូរៃ ស្រុកថាឡាបរិវ៉ាត់ ខេត្តស្ទឹងត្រែង មានចម្ងាយផ្លូវពីទីរួមខេត្តប្រមាណជាង ២០ គីឡូម៉ែត្រស្របតាមដងទន្លេមេគង្គ៕

អត្ថបទ៖ ងិនលីម