ថៃប្រទះឃើញអាវុធយុទ្ធភណ្ឌជាច្រើន​ប្រភេទ​ រួមទាំងគ្រាប់រំសេវនៅក្បែរព្រំដែនកម្ពុជា

អាវុធជាច្រើនប្រភេទរួមទាំងគ្រាប់រំសេវផងនោះត្រូវបានកម្លាំងយោធាថៃរកឃើញនៅពេលកំពុងល្បាតតាមខ្សែបន្ទាត់ព្រំដែន ដែលជនមិនស្គាល់មុខបានវេចខ្ចប់យ៉ាងស្អាតលាក់ទុកនៅតាមកំពតព្រៃ។

កាលពីថ្ងៃទី ២២ ខែមករា ឆ្នាំ២០២៤ កម្លាំងយោធាព្រំដែនថៃលេខ ៥២៣ និង ៥២៦ បានធ្វើការចេញល្បាតខ្សែបន្ទាត់ព្រំដែនរបស់ខេត្តច័ន្ទបុរី និងខេត្តត្រាត ដើម្បីត្រួតពិនិត្យបទល្មើសនានាអាចឆ្លងដែនពីកម្ពុជាទៅថៃនិងពីថៃមកកម្ពុជា។

យោងតាមការផ្សាយរបស់គេហទំព័រថៃរ៉ាត់ ខណៈដែលកម្លាំងយោធាព្រំដែនថៃធ្វើការល្បាតដល់ចំណុចព្រៃមួយកន្លែងជាប់ចំការមៀននៅត្រង់ចំណុចស្រុកសយដាវ ខេត្តច័ន្ទបុរី ក៏បានប្រទះឃើញវត្ថុគួរឱ្យសង្ស័យដែលគេរុំដោយការ៉ុងជីជាច្រើនដុំលាក់ទុកនៅតាមព្រៃដោយមានការសង្ស័យកម្លាំងយោធាតុថៃបានចូលទៅត្រួតពិនិត្យលើវត្ថុទាំងនោះ។

ក្រោយការត្រួតពិនិត្យឬកម្លាំងយោធាថៃបានរកឃើញ អាវុធប្រភេទ M16 ចំនួន 15 ដើម អាវុធ AK 47 ចំនួន 22 ដើម អាវុធសម្រាប់បាញ់បញ្ជូនគ្រាប់បែកខ្នាត 40 មីលីម៉ែត្រ (M203) ចំនួនមួយដើម អាវុធខ្នាត 12.7 មីលីម៉ែត្រចំនួនមួយដើម គ្រាប់កាំភ្លើងខ្នាត 12.7 មីលីម៉ែត្រចំនួន 510 គ្រាប់។

បច្ចុប្បន្នកម្លាំងយោធាថៃបានប្រមូលអាវុធទាំងនោះយកទៅរក្សាទុកដើម្បីស្រាវជ្រាវរកប្រភពដើម ហើយក៏កំពុងបន្តរុករកតាមខ្សែបន្ទាត់ព្រំដែនបន្ថែមទៀត ដើម្បីរក្សាសុខសុវត្ថិភាពជូនប្រជាពលរដ្ឋ៕

អត្ថបទ៖ សោ និយមរ័ត្ន