ប្រទះឃើញគ្រឿងញៀនជាង២គីឡូក្រាមនៅជាប់របងប៉ុស្ដិ៍នគរបាលឃ្មួញ

កម្លាំងនគរបាលនៃប៉ុស្តិ៍នគរបាលរដ្ឋបាលឃ្មួញ អធិការដ្ឋាននគរបាលខណ្ឌសែនសុខ បានប្រទះឃើញថ្នាំញៀនជាង២គីឡូក្រាមនៅជាប់របងប៉ុស្តិ៍នគរបាលរដ្ឋបាលឃ្មួញ ខណៈសមត្ថកិច្ចសន្និដ្ឋានថា គឺជនសង្ស័យភ័យខ្លាចដោយមានគោលដៅសមត្ថកិច្ចចុះអនុវត្តត្រួតពិនិត្យជាតិស្រវឹង និងអាវុធជាតិផ្ទុះ។

តាមរបាយការណ៍របស់ស្នងការដ្ឋាននគរបាលរាជធានីភ្នំពេញបានឲ្យដឹងនៅរសៀលថ្ងៃទី៧កុម្ភៈនេះថា កម្លាំងប៉ុស្តិ៍នគរបាលរដ្ឋបាលឃ្មួញ បានរកឃើញថង់ចំនួន០៣ថង់ សង្ស័យជាសារធាតុញៀន ក្នុងនោះមានកញ្ចប់ពណ៌ខៀវទំពាំងបាយជូ ចំនួន១៩៤កញ្ចប់ និងកញ្ចប់ពណ៌ក្រហមស្តូប៊ូរី ចំនួន១១០កញ្ចប់ ទុកចោលនៅជាប់របងប៉ុស្តិ៍នគរបាលរដ្ឋបាលឃ្មួញ។

បន្ទាប់ពីបានរកឃើញកម្លាំងប៉ុស្តិ៍នគរបាលរដ្ឋបាលឃ្មួញ បានសហការជាមួយការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ រកឃើញសារធាតុញៀនប្រភេទ អ៉ិចស្តាស៊ី (MDMA) ចំនួន ៣០៤កញ្ចប់ ទម្ងន់២,៤៤១.៧៨ក្រាម។ បច្ចុប្បន្ន កម្លាំងសមត្ថកិច្ចកំពុងធ្វើការស្រាវជ្រាវបន្ត៕