ថៃឃាត់ខ្លួនបុរសខ្មែរម្នាក់ រឹបអូសអាវុធជាច្រើន នៅលើផ្ទៃទឹកសមុទ្រ

អាវុធជាច្រើនដើម និងគ្រាប់រំសេវរាប់ពាន់គ្រាប់ ត្រូវបានកម្លាំងយោធាថៃបង្ក្រាបបាននៅលើផ្ទៃទឹកសមុទ្រ ខណៈបុរសជនជាតិខ្មែរម្នាក់រកស៊ីជួញដូរអាវុធទាំងកណ្ដាលអាធ្រាត្រ។

កិច្ចប្រតិបត្តិការនេះបានធ្វើឡើងនៅវេលាម៉ោង ៣៖៤០ នាទីទៀបភ្លឺ ថ្ងៃទី ៩ កុម្ភៈ ឆ្នាំ ២០២៤ កម្លាំងយោធាវីរៈការពារព្រំដែន ខេត្តច័ន្ទបុរី និងខេត្តត្រាតបានចេញល្បាតលើផ្ទៃទឹក និងរួមសហការជាមួយកម្លាំងនាវិកលេខ ១៨២ បានស្កាត់ចាប់កាណូតមួយគ្រឿងដែលកំពុងបើកបរនៅលើផ្ទៃទឹកទាំងយប់ងងឹត។

បុរសជនសង្ស័យឈ្មោះ រ៉ែន អាយុ ២០ ឆ្នាំ ដោយនៅលើការណូតនោះគឺមានដឹកអាវុធ និងគ្រាប់រំសេវជាច្រើនរួមមាន អាវុធធុន M 16 ចំនួន ២ ដើម អាវុធប្រភេទ AK 47 ចំនួន ៨ ដើមបង់អាវុធ M 16 ប្រភេទ ៣០ គ្រាប់ ចំនួនពីរ បង់អាវុធចំនួន AK 45 បង់  គ្រាប់កាំភ្លើង AK 47 ចំនួន ២ កែស ដែលក្នុងមួយកែស មាន ៧២០ គ្រាប់ សរុប មានចំនួន ១.៤៤០ គ្រាប់ លុយ​បាតចំនួន ១.០០០ បាត លុយខ្មែរចំនួន ៣.៥០០ រៀល ថ្នាំញៀនប្រភេទម៉ាទឹកកករួម និងឧបករណ៍សេពចំនួនមួយឈុត កាណូតស្មាច់មួយគ្រឿង និងទូរសព្ទដៃមួយគ្រឿង។

បច្ចុប្បន្នជនសង្ស័យ និងវត្ថុតាងទាំងអស់កំពុងបញ្ជូនទៅកាន់ទីបញ្ជាការដ្ឋានដើម្បីសាកសួរបន្ថែម៕

អត្ថបទ៖ សោនិយមរ័ត្ន