សមត្ថកិច្ចបញ្ជូនខ្លួនបុរសដែលសម្ដែងជាតួអង្គស្ត្រីឈ្មោះ គង់ ម៉ូលីកា ទៅតុលាការហើយនៅរសៀលថ្ងៃទី១៤កុម្ភៈនេះ

បុរសម្នាក់ដែលប្រឌិតរឿងដើរតួអង្គជាស្ត្រីឈ្មោះ គង់ ម៉ូលីកា បង្ហោះសារចែករំលែកចោទប្រកាន់មន្ត្រីនគរបាលចរាចរណ៍នៅគោលដៅស្តុបក្ដាន់ពីរពាក់ព័ន្ធករណីផាកពីន័យកាលពីកន្លងទៅ ត្រូវបានកម្លាំងនគរបាលនៃស្នងការដ្ឋាននគរបាលរាជធានីភ្នំពេញឃាត់ខ្លួន និងបានបញ្ជូនទៅសាលាដំបូងរាជធានីភ្នំពេញហើយនៅរសៀលថ្ងៃទី១៤ ខែកុម្ភៈ ឆ្នាំ២០២៤​នេះ។ នេះបើតាមការបញ្ជាក់ពីលោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ។

លោកវរសេនីយ៍ឯក សំ វិច្ឆិកា បញ្ជាក់ថា បុរសជាជនសង្ស័យដែលដើរតួអង្គសម្ដែងជាស្ត្រីឈ្មោះ គង់ ម៉ូលីកា មានឈ្មោះ យិន សុផាណា បានចូលរួមរៀបចំប្រឌិតផែនការក្លែងក្លាយចោទប្រកាន់មកលើមន្ត្រីនគរបាលចរាចរណ៍នៅគោលដៅស្តុបក្ដាន់ពីរ និងមានអ្នកពាក់ព័ន្ធមួយចំនួនទៀតចូលរួមក្នុងផែនការនេះ ខណៈសមត្ថកិច្ចជំនាញកំពុងស្រាវជ្រាវបន្ថែមដើម្បីយកមកអនុវត្តតាមនិតីវិធី។

អ្នកនាំពាក្យស្នងការដ្ឋាននគរបាលរាជធានីភ្នំពេញបានបញ្ជាក់បន្ថែមថា ជនសង្ស័យឈ្មោះ យិន សុផាណា បានរៀបចំផែនការដោយយកប្រាក់ទៅដាក់នៅកន្លែងវេរប្រាក់មួយកន្លែងនៅក្នុងមូលដ្ឋានខណ្ឌជ្រោយចង្វារ ដោយវេរចូលគណនី​ABAរបស់ជនស៊ីវិលម្នាក់ដែលអង្គុយលេង ក្រោយពីជនស៊ីវិលនោះទឹកជូននគរបាលចរាចរណ៍នៅគោលដៅនោះ។

បើតាមលោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ជនសង្ស័យឈ្មោះ យិន សុផាណា ត្រូវបានឃាត់ខ្លួនកាលពីថ្ងៃទី១៣ ខែកុម្ភៈ ឆ្នាំ២០២៤។ លោកក៏សូមឲ្យអ្នកនិយមលេងបណ្ដាញសង្គមមួយចំនួនតូច សូមពិចារណាឲ្យបានគ្រប់ជ្រុងជ្រោយមុនធ្វើការវាយប្រហារអ្វីមួយ ព្រោះវាអាចប៉ះពាល់ដល់កិត្តិយសសេចក្ដីថ្លៃថ្នូររបស់បុគ្គល និងស្ថាប័នដែលស្អាតស្អំ។ លោក ជួន ណារិន្ទ បញ្ជាក់ថា សាច់រឿងខាងលើអាចនៅមានបន្តទៀត៕

អត្ថបទ៖ សុខុម