ទាញកាំបិតដេញចាក់សង្សារមិនបាន រត់ទៅ​ចង​កសម្លាប់ខ្លួនឯង

បុរសម្នាក់យកកាំបិតដេញចាក់នារីជាសង្សារតែមិនបានសម្រេច ខឹងចិត្តក៏ទៅចងកសម្លាប់ខ្លួនឯង បង្កការភ្ញាក់ផ្អេីលកាលពីវេលាម៉ោង០៨និង៣០នាទី ថ្ងៃទី១៧ ខែកុម្ភៈ ឆ្នាំ២០២៤ នៅចំណុចបុរី អឹលវី ផ្ទះលេខG1A12 ផ្លូវ០២ ភូមិទួល ពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះ (សព)ឈ្មោះ ណឹម ម៉ៃ ភេទប្រុស អាយុ២៦ឆ្នាំ មានស្រុកកំណើតនៅភូមិត្រពាំងរុន ឃុំតានី ស្រុកអង្គជ័យខេត្តកំពត បច្ចុប្បន្នស្នាក់នៅកន្លែងកេីតហេតុ។

យោងតាមការបំភ្លឺរបស់ឈ្មោះ ទូច វីស្សា ភេទស្រី អាយុ២២ឆ្នាំ ត្រូវជាមិត្តស្រីរបស់ជនរងគ្រោះបានឱ្យដឹងថា នៅមុនពេលកេីតហេតុរូបគាត់ និងជនរងគ្រោះបានឈ្លោះគ្នាហេីយជនរងគ្រោះបានយកកូនកាំបិតដេញចាក់គាត់ ពេលនោះគាត់ ភ័យពេកបានរត់ទៅបន្ទប់មិត្តភក្ដិឱ្យជួយ។ នៅពេលនោះមិត្តភក្តិរបស់គាត់ និងគាត់ក៏បានចុះមកខាងក្រោម មួយសន្ទុះក្រោយមកក៏ស្ងាត់ពួកគាត់ទាំងពីរនាក់បានឡើងទៅមេីលស្រាប់តែឃើញជនរងគ្រោះចងកសម្លាប់ខ្លួនបាត់ទៅហេីយនៅជាប់នឹងចំរឹងដែកបង្អួច។

បន្ទាប់ពីបានឃើញដូចនេះ គាត់ក៏បានរាយការណ៍ទៅសមត្ថកិច្ចតែម្ដង។ តាមការពិនិត្យ និងកោសល្យវិច័យរបស់ សមត្ថកិច្ចនគរបាលបច្ចេកទេសវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញបានឱ្យដឹងថា ជនរងគ្រោះស្លាប់ ដោយសារចងកសម្លាប់ខ្លួនពិតប្រាកដមែន និងមានសារធាតុញៀននៅក្នុងខ្លួន។ សព ត្រូវបានប្រគល់ទៅឱ្យក្រុមគ្រួសារ យកទៅធ្វើបុណ្យតាមប្រពៃណី៕

អត្ថបទ៖ សុខា