លោក ទូច សុខៈ ៖១សប្តាហ៍សមត្ថកិច្ចបង្ក្រាបក្មេងទំនើងយ៉ាងហោចណាស់ ៥០នាក់

អ្នកនាំពាក្យរងក្រសួងមហាផ្ទៃ លោក ទូច សុខៈ បានឱ្យដឹងថា ក្នុងសប្ដាហ៍កន្លងទៅ សមត្ថកិច្ច ទូទាំងប្រទេស បានយកចិត្តទុកដាក់បង្ក្រាបក្រុមក្មេងទំនើងបាន ២២ករណី និងឃាត់ខ្លួនបានយ៉ាងហោចណាស់៥៧នាក់។

បើតាមលោក ទូច សុខៈ ករណីក្មេងទំនើងនេះ មានការបង្ក្រាបជាបន្តបន្ទាប់ពីអាជ្ញាធរគ្រប់ជាន់ថ្នាក់ រហូតធ្វើឱ្យករណីនេះមានការថយចុះជាងសប្តាហ៍មុន។ ជាមួយគ្នានេះ លោកបានសង្កត់ធ្ងន់ថា ទោះបីជាមានការថយចុះករណីនេះក៏ពិតមែន តែសមត្ថកិច្ចមិនបន្ធូរដៃក្នុងការអនុវត្តច្បាប់ និងបង្ក្រាបក្រុមក្មេងទំនើងនេះឡើយ។ មួយវិញទៀត មាតា បិតា អាណាព្យាបាលមានតួនាទីសំខាន់បំផុត ក្នុងការបង្កើនការយកចិត្តទុកដាក់អប់រំទូន្មាន និងតម្រង់ទិសកូនឱ្យបានល្អ ។

គួររម្លឹកថា កាលពីចុងឆ្នាំ២០២៣ សង្កេតឃើញថាករណីក្មេងទំនើងមានការកើនឡើងខ្លាំង និងបង្កជាអសន្តិសុខនៅក្នុងសង្គមធ្វើឱ្យប្រជាជនភ័យខ្លាចមិនហ៊ានចេញពីផ្ទះឡើយ។ ទន្ទឹមនឹងបញ្ហាទាំងអស់នេះ ក៏មានចំណាត់ការ និងការបង្ក្រាបភ្លាមៗពីថ្នាក់ដឹកនាំដើម្បីកុំឱ្យមានករណីនេះកើតឡើងទៀត តាមរយៈការពង្រឹង និងអនុវត្តច្បាប់កាន់តែខ្លាំងក្នុងការការពារសន្តិសុខ សណ្តាប់ធ្នាប់ជូនប្រជាពលរដ្ឋ៕