ឃាត់ខ្លួនស្ត្រីម្នាក់ក្រោយប្រើអំពើហិង្សាលើកូនប្រុសអាយុជាង១ខួប

ស្ត្រីម្នាក់ប្រេីអំពើហិង្សាលើកូនប្រុសខ្លួនដែលមានអាយុទេីបតែជាង១ខួបបណ្តាលឱ្យរងរបួសត្រូវបានកម្លាំងសមត្ថកិច្ចឃាត់ខ្លួនយកទៅសួរនាំ។

ហេតុការណ៍នេះបង្កការភ្ញាក់ផ្អេីលកាលពីវេលាម៉ោង៧និង៤០នាទីយប់ ថ្ងៃទី២០ ខែកុម្ភៈ ឆ្នាំ២០២៤ នៅចំណុចមុខផ្សារទំនើបអុីអន១ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ប្រភពពីប្រជាពលរដ្ឋរស់នៅក្បែរកន្លែងកើតហេតុបានប្រាប់ឱ្យដឹងថា មុនពេលកើតហេតុដោយឃើញស្រ្តីជាម្តាយពុំដឹងថាមានវិបត្តិអ្វីនោះទេ បានប្រើអំពើហិង្សាទៅលើកូនប្រុសទើបតែអាយុ១ខួបដោយវាយ និងចាប់បោកបណ្ដាលឱ្យបែកក្បាលឈាមជោកខ្លួន។ ពេលនោះដែរពលរដ្ឋជិតខាងក៏បាននាំគ្នារត់ទៅជួយឃាត់ និងយកក្មេងប្រុសរូបនោះចេញពីម្តាយ និងទាក់ទងទៅសមត្ថកិច្ចចុះមកជួយអន្តរាគមន៍ឃាត់យកទៅប៉ុស្ដិ៍នគរបាលរដ្ឋបាលទន្លេបាសាក់ដើម្បីសួរនាំបន្តនិងចាត់ការទៅតាមនីតិវិធីច្បាប់។ ចំណែកឯក្មេងរងគ្រោះត្រូវបានពលរដ្ឋជិតខាង និងកម្លាំងសមត្ថកិច្ចដឹកទៅសង្គ្រោះបន្ទាន់នៅមន្ទីរពេទ្យគន្ធបុប្ផាផងដែរ៕

អត្ថបទ៖ សុខា