រយៈពេលមួយសប្ដាហ៍ សមត្ថកិច្ចក្រសួងមហាផ្ទៃឃាត់ខ្លួនជនសង្ស័យលេងល្បែងស៊ីសងខុសច្បាប់ ១៥នាក់

លោក ទូច សុខៈ អ្នកនាំពាក្យរងក្រសួងមហាផ្ទៃ បានឱ្យដឹងថាក្នុងសប្ដាហ៍ចុងក្រោយនេះ ពោលគឺចាប់ពីថ្ងៃទី១៩ ដល់ថ្ងៃទី២៥ ខែកុម្ភៈ ឆ្នាំ២០២៤ សមត្ថកិច្ចនគរបាលក្រសួងមហាផ្ទៃ បានបង្ក្រាបករណីល្បែងស៊ីសងសរុបចំនួន ៩ករណី ដោយឃាត់ខ្លួនជនសង្ស័យបានចំនួន ១៥នាក់។

បើតាមអ្នកនាំពាក្យរូបនេះ ករណីលេងល្បែងស៊ីសងខុសច្បាប់សរុបនោះមាន នៅខេត្តតាកែវ ២ទីតាំង ខេត្តឧត្តរមានជ័យ ១ទីតាំង ខេត្តត្បូងឃ្មុំ ២ទីតាំង ខេត្តកំពត ៣ទីតាំង និងខេត្តបាត់ដំបងមាន ១ទីតាំង។ ដោយឡែក ជនសង្ស័យដែលសមត្ថកិច្ចចាប់ឃាត់ខ្លួនទាំង ១៥នាក់នោះ មានមួយចំនួនត្រូវបានអនុវត្តវិធានការអប់រំ និងធ្វើកិច្ចសន្យាបញ្ឈប់សកម្មភាព និងមួយចំនួនទៀតត្រូវបានកសាងសំណុំរឿងបញ្ជូនទៅតុលាការ។

ជាការកត់សម្គាល់ កាលពីសប្ដាហ៍កន្លងទៅ សមត្ថកិច្ចនគរបាល បានបង្ក្រាបករណីលេងល្បែងស៊ីសងខុសច្បាប់បាន ១៤៨ករណី ដោយឃាត់ខ្លួនជនសង្ស័យ ១៣នាក់ បញ្ជូនទៅតុលការ និង ១៧៤នាក់ ទៀតត្រូវបានអប់រំធ្វើកិច្ចសន្យាមុននឹងអនុញ្ញាតឱ្យត្រឡប់ទៅផ្ទះវិញ។ ក្នុងចំណោមករណីសរុបនោះ ខេត្តបាត់ដំបងមាន ១៣៦ករណី កំពត ៥ករណី តាកែ ១ករណី ប៉ៃលិន ១ករណី និងខេត្តត្បូងឃ្មុំ ១ករណី។

អ្នកនាំពាក្យដដែល បានគូសបញ្ជាក់ថា ក្រោមការដឹកនាំប្រកបដោយភាពប៉ិនប្រសព្វរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា និង លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដឹកនាំបញ្ជាឱ្យសមត្ថកិច្ចយកចិត្តទុកដាក់ខ្ពស់ចំពោះការងារអាទិភាពចំនួន៦ ក្នុងនោះក៏មានការបង្ក្រាបល្បែងស៊ីសងខុសច្បាប់នេះផងដែរ៕