អ្នកលក់ដូរ តាមបណ្ដោយផ្លូវ ១៣៤ និងមុខមន្ទីរពេទ្យបង្អែករាជធានីភ្នំពេញ ស្នើអាជ្ញាធរពន្យាពេលរុះរើចេញ

ក្រុមអ្នកលក់ដូរតាមរទះ នៅមុខមន្ទីរពេទ្យបង្អែករាជធានីភ្នំពេញ និងតាមបណ្ដាយផ្លូវលេខ ១៣៤ ស្នើសុំដល់អាជ្ញាធរខណ្ឌ៧មករា ទុកពេលឱ្យពួកគាត់បានរុះរើចេញយ៉ាងតិចណាស់ត្រឹម ១សប្ដាហ៍ ខណៈពេលអាជ្ញាធរចុះរៀបចំសណ្ដាប់ធ្នាប់ដោយណែនាំឱ្យអ្នកលក់ទាំងអស់ ដែលយកចិញ្ចឹមផ្លូវជាអាជីវកម្ម ត្រូវប្រញាប់រុះរើចេញជាបន្ទាន់ ក្នុងរយៈពេលត្រឹមតែ ៣ថ្ងៃ តែប៉ុណ្ណោះ។

អ្នកស្រី ប៉ី ប៉ី ម្ចាស់តូបលក់កាហ្វេហ្វីន ម្ដុំផ្លូវ១៣៤ បានប្រាប់ឱ្យ កម្ពុជាថ្មី ដឹងថា អ្នកស្រី មិនបដិសេធនឹងការចុះរៀបចំសណ្ដាប់ធ្នាប់របស់អាជ្ញាធរ នោះឡើយ ប៉ុន្ដែ អ្នកស្រី ស្នើសុំអាជ្ញាធរទុកពេលសម្រាប់ការរុះរើចេញយ៉ាងតិច ១សប្ដាហ៍ និងសូមឱ្យអាជ្ញាធរអនុវត្តការងារប្រកបដោយតម្លាភាព ស្មើភាពគ្នាទាំងអស់សម្រាប់អ្នកលក់ដូរទាំងអស់ នៅត្រង់ចំណុចផ្លូវ១៣៤ ​​និងមុខមន្ទីរពេទ្យបង្អែករាជធានីភ្នំពេញនេះ ផ្ទាល់តែម្ដង។

អ្នកស្រី បន្ថែមថា អ្នកស្រី បានបើកតូបលក់កាហ្វេនៅទីនេះ ជាង១៥ឆ្នាំមកហើយ អ្នកស្រី ទទួលស្គាល់ផ្លូវម្ដុំមន្ទីរពេទ្យនេះ មានលក្ខណៈចង្អៀត និងមានការកកស្ទះ យ៉ាងពិតប្រាកដមែន តែប្រសិនបើគ្មានជម្រើសទើប អ្នកស្រី នៅតែបន្តលក់ដូរនៅទីនេះ ម្យ៉ាងក៏ដោយសារ អ្នកស្រី មានអតិថិជនដែលមកជួយទិញកាហ្វេក៏ច្រើនផងនោះ​ ទើបអ្ន​កស្រី មិនដាច់ចិត្តរុះរើចេញ ពីកន្លែងនេះ។

ចំណែក អ្នកលក់ចេកអាំង តាមរទះម្នាក់ សុំមិនបញ្ចេញឈ្មោះក៏បានប្រាប់ឱ្យ កម្ពុជាថ្មី ដឹងដូចគ្នាដែរថា លោកក៏មិនបដិសេធនឹងការចុះរៀបចំសណ្ដាប់ធ្នាប់របស់អាជ្ញាធរដែរ ប៉ុន្ដែសូមអាជ្ញាធរចុះអនុវត្តការងាររបស់ខ្លួន ឱ្យស្មើភាពគ្នា រវាងអ្នកលក់ដូរ នៅទីនេះផង។

អ្នកលក់ដូររូបនេះ អះអាងទៀតថា ប្រសិនបើអាជ្ញាធរឱ្យរុះរើចេញ ត្រូវតែរុះរើចេញទាំងអស់គ្នា មិនមែនចេញតែអ្នកលក់ដូរតាមរទះ តែអ្នកលក់ផ្សេងទៀតនៅតែបន្តលក់ដូរបានធម្មតានោះទេ។

យ៉ាងណា អ្នកលក់ដូរម្នាក់ទៀត សុំមិនបញ្ចេញឈ្មោះដូចគ្នា ក៏បានប្រាប់ឱ្យ កម្ពុជាថ្មី ដឹងថា ក្នុងនាមលោកជាអាជីវករលក់ដូរបន្ដិចបន្ដួច សូមស្នើសុំដល់អាជ្ញាធរ មេត្តាពិចារណាឱ្យបានច្បាស់លាស់ជាមុនសិន មុននឹង​ឱ្យរុះរើចេញ សូមទុកពេលឱ្យអ្នកលក់ទាំងអស់ បានត្រៀមលក្ខណៈ និងស្វែងរកកន្លែងលក់ថ្មី បានសិន។

លោក បន្ថែមថា ការលក់ដូរនៅមុខមន្ទីរពេទ្យបង្អែករាជធានីភ្នំពេញនេះ លោក និងគ្រួសារ បានលក់ដូរជាង ៣ជំនាន់ មកហើយ ប្រសិនបើ អាជ្ញាធរ ឱ្យរុះរើចេញទុករយៈពេលតែ ៣ថ្ងៃ តើឱ្យលោកទៅរកកន្លែងណាលក់បានភ្លាមៗនោះ?

គូរបញ្ជាក់ថា កាលពីថ្ងៃទី ២៩ ខែកុម្ភៈ កន្លងទៅនេះ​ កម្លាំងគណៈបញ្ជាការឯកភាពខណ្ឌ ៧មករា បានចុះរៀបចំសណ្ដាប់ធ្នាប់តាម​បណ្ដោយ​ផ្លូវ​លេខ​១៣៤ ចំណុច មុខមន្ទីរពេទ្យបង្អែករាជធានីភ្នំពេញ ដោយ​ធ្វើកិច្ច​សន្យា​ទុក្ខ​រយៈពេល​៣ថ្ងៃ​ឱ្យ​ក្រុម​អាជីវករ​លក់ដូរ ដែលរំលោភលើចិញ្ចើមផ្លូវរុះរើចេញដោយខ្លួនឯង បើពុំដូច្នេះ​ទេ ​អាជ្ញាធរ និង​ចុះចា​ត់​វិធាន​ការរដ្ឋបាល៕

អត្ថបទ ៖ សួស សិត