អគ្គិភ័យបំផ្លាញផ្ទះពលរដ្ឋ៥ខ្នង នៅក្រោយរបងម៉ុងឌីយ៉ាល់

ករណីអគ្គិភ័យបានបំផ្លាញផ្ទះប្រជាពលរដ្ឋចំនួន៥ខ្នង ក្នុងថ្ងៃទី០៦ ខែមីនា ឆ្នាំ២០២៤ នេះ នៅត្រង់ចំណុចក្រោយរបងម៉ុងឌីយ៉ាល់ សង្កាត់ផ្សារដើមគ ខណ្ឌទួលគោក រាជធានីភ្នំពេញ។

  
តាមប្រភពបានឱ្យដឹងថា នៅមុនពេលកើតហេតុ គេឃើញភ្លើងបានឆាបឆេះចេញពីជាន់ទី១ នៃផ្ទះឈើមួយខ្នង ដែលម្ចាស់បិទទ្វារទុកចោល ហើយបានឆេះរាលដាលយ៉ាងរហ័សទៅផ្ទះផ្សេងទៀត ដែលនៅជាប់នោះយ៉ាងសន្ធោសន្ធៅ ។ភ្លាមៗ បង្កឱ្យមានការភ្ញាក់ផ្អើលដល់ប្រជាពលរដ្ឋនាំគ្នាជញ្ជូនអីវ៉ាន់ចេញនិងទាក់ទងទៅរថយន្តពន្លត់អគ្គិភ័យទៅធ្វើអន្តរាគមន៍។

តាមនគរបាលការិយាល័យបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញបានឱ្យដឹងថា នៅក្នុងហេតុការណ៍នេះ រថយន្តពន្លត់អគ្គិភ័យប្រមាណជិត២០គ្រឿងបានទៅអន្តរាគមន៍បាញ់ពន្លត់។ ផ្ទះដែលត្រូវភ្លើងឆេះជាប្រភេផ្ទះធ្វើពីឈើលើថ្មក្រោម  ប្រក់ស័ង្កសី ដែលបានសង់ជាប់ៗគ្នា តាមផ្លូវឌឿងហែម។

អគ្គិភ័យនេះបានបំផ្លាញផ្ទះអស់៥ខ្នងទាំងស្រុង រួមជាមួយសម្ភារះមួយចំនួនទៀត។ទាក់ទិនការកើតមានអគ្គិភ័យនេះ សមត្ថកិច្ចពុំទាន់ដឹងពីមូលហេតុអ្វីនៅឡើយ កំពុងតែស្រាវជ្រាវ។ទោះបីជាយ៉ាងណាគេមានការសង្ស័យថា បណ្តាលមកពីឆ្លងចរន្តអគ្គិសនី៕

អត្ថបទ៖ សុខា