លោកអាចារ្យធំ ចូលបំភ្លឺនៅតុលាការខេត្តសៀមរាប ពាក់ព័ន្ធបណ្ដឹងរបស់ប្រធានសមាគមមិត្តសិល្បៈស្ម័គ្រចិត្តជួយសង្គម

នៅរសៀលថ្ងៃទី១៣ ខែមីនានេះ លោកអាចារ្យធំ បានចូលខ្លួនទៅបំភ្លឺនៅតុលាការខេត្តសៀមរាប ពាក់ព័ន្ធនឹងបណ្ដឹងរបស់ឧកញ៉ា ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម។

លោក គង់ សំសារ៉េត ព្រះរាជអាជ្ញារងនៃអយ្យការអមសាលាដំបូងខេត្តសៀមរាប បានចេញដីកាកោះហៅលោក ស្រាន់ សុខរុំ ហៅ អាចារ្យធំ ភេទប្រុស កើតឆ្នាំ១៩៨៥ ជនជាតិខ្មែរ មានអាសយដ្ឋានបច្ចុប្បន្ន ក្រុម៤ ភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប ឱ្យចូលមកកាន់អយ្យការអមសាលាដំបូងខេត្តសៀមរាប (បន្ទប់លេខ “ក៧”) នៅថ្ងៃទី១៣ ខែមីនា ឆ្នាំ២០២៤ វេលាម៉ោង២និង៣០នាទីរសៀល ដើម្បីមកបំភ្លឺពាក់ព័ន្ធនឹងបណ្តឹងរបស់ឈ្មោះ ហេង ឡុង ពីបទ ញុះញង់ឲ្យមានការរើសអើង បរិហារកេរ្តិ៍ និងជេរប្រមាថជាសាធារណៈ ប្រព្រឹត្តនៅខេត្តសៀមរាប កាលពីថ្ងៃទី១៣ ខែកុម្ភៈ ឆ្នាំ២០២៤៕

អត្ថបទ៖ កុសល