សមត្ថកិច្ចបញ្ជូនក្រុមក្មេងទំនើង១២នាក់ទៅតុលាការ

ក្រុមក្មេងទំនើងចំនួន១២នាក់ ដែលតែងធ្វើសកម្មភាពអុកឡុកដោយការដើរកាប់ចាក់យ៉ាងសកម្ម នៅក្នុងភូមិសាស្ត្ររាជធានីភ្នំពេញ ហេីយត្រូវបានកម្លាំងសមត្ថកិច្ចបង្ក្រាបបាន ពេលនេះសមត្ថកិច្ចនៃស្នងការដ្ឋាននគរបាលរាជធានីភ្នំពេញ បានបញ្ជូនទៅកាន់សាលាដំបូងរាជធានីភ្នំពេញ នាព្រឹកថ្ងៃទី១៤ ខែមីនា ឆ្នាំ២០២៤នេះ ។

លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានប្រាប់ឱ្យដឹងថា ក្រុមក្មេងទំនើងខាងលើនេះ ត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បង្ក្រាបបន្ទាប់ពីក្រុមពួកគាត់មានបក្ខពួកជាច្រើននាក់ ប្រដាប់ដោយកាំបិត និងដាវ ណាត់គ្នាជាមួយភាគីមួយក្រុមទៀត ដើម្បីជួបគ្នាត្រៀមបើកឆាកប្រយុទ្ធគ្នា នៅផ្លូវ៦០ម៉ែត្រ ក្នុងខណ្ឌមានជ័យ កាលពីយប់ថ្ងៃទី១២ ខែមីនា ឆ្នាំ២០២៤ ។

ប៉ុន្តែមិនទាន់បានជួបគ្នាតាមការណាត់ផង ក៏ត្រូវសមត្ថកិច្ចចេញធ្វើការបង្ក្រាប ដោយក្រុមក្មេងទំនើងបានតបតជាមួយសមត្ថកិច្ចដោយបណ្តាលឱ្យនគរបាលម្នាក់រងរបួសផងដែរ៕

អត្ថបទ៖​ សុខា