Update៖ ករណីឆេះផ្ទះក្នុងបុរីពិភពថ្មីកំបូល កើតឡើងដោយសារឆ្លងចរន្តអគ្គិសនី

អគ្គិភ័យដែលឆាបឆេះផ្ទះប្រជាពលរដ្ឋនៅក្នុងបុរីពិភពថ្មីកំបូល គឺផ្ដើមចេញពីការឆ្លងចរន្តអគ្គិសនីដែលបណ្ដាល​ឆេះ​​​​​​​​​​​​​​​​​​​​​​​ខូចខាតសម្ភារមួយចំនួន និងរាលដាលផ្ទះនៅជាប់គ្នាផងដែរ។

ករណីអគ្គិភ័យនេះ បានកើតឡើងនៅចំណុចផ្ទះលក់អង្ករ ផ្ទះលេខ៦៥ ផ្លូវលេខ១៩c ក្នុងភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញ ហើយត្រូវបានប្រជាពលរដ្ឋរាយការណ៍ទៅសមត្ថកិច្ចទាក់ទងទៅក្រុមរថយន្តពន្លត់អគ្គិភ័យមកអន្តរាគមន៍ភ្លាមៗ។

តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញមានផ្សែងយ៉ាងខ្មួលខ្មាញ់ចេញពីផ្នែកខាងក្រោយ និងជាន់ទីមួយ ភ្លាមនោះប្រជាពលរដ្ឋក៏បាននាំគ្នាយកបំពង់ពន្លត់អគ្គិភ័យមកបាញ់ពន្លត់ តែដោយសារតែការឆាបឆេះមានផ្សែងខ្លាំងទេីបពិបាកចូលទៅបាញ់ពន្លត់ក៏រាយការណ៍ទៅអាជ្ញាធរមានសមត្ថកិច្ចទាក់ទងទៅក្រុមរថយន្តពន្លត់អគ្គិភ័យមកអន្តរាគមន៍ជាច្រេីនគ្រឿង។

ក្នុងហេតុការណ៍គ្រោះអគ្គិភ័យខាងលេីនោះផងដែរក៏បានរាលដាលដល់ផ្ទះជាប់គ្នាដែលទុកចោលបណ្តាលឱ្យរងការខូចខាតផងដែរតែមិនមានមនុស្សរងរបួសនោះទេ។ សមត្ថកិច្ចបានបញ្ជាក់ថា មូលហេតុនៃការឆាបឆេះខាងលេីបណ្តាលមកពីឆ្លងចរន្តអគ្គិសនី៕

អត្ថបទ៖ សុខា