អគ្គ​លេខាធិការដ្ឋាន​នៃ គ.ល.ក. ជូន​ដំណឹង​ដល់​សាធារណជន​កុំ​​ឱ្យ​ចូល​រួម​សកម្មភាព​កាស៊ីណូអនឡាញ​​

អគ្គលេខាធិការដ្ឋាន នៃ គណៈកម្មការគ្រប់គ្រងល្បែងពាណិជ្ជកម្មកម្ពុជា ហៅកាត់ថា “គ.ល.ក. បាន​ជូន​ដំណឹង​ដល់​សាធារណជន​កុំ​ឱ្យ​ចូលរួម​សកម្មភាព​លេង​ល្បែង​កាស៊ីណូអនឡាញ។ នេះ​បើ​តាម ​គ.ល.ក. បាន​ឱ្យដឹងនា​យប់​ថ្ងៃទី២៥ ខែមីនា ឆ្នាំ២០២៤។

គ.ល.ក. បាន​សរសេរបន្ថែម​នៅលើទំព័រហ្វេសបុក​ថា ដោយ​ពិនិត្យ​ឃើញ​មាន​ការ​ផ្សព្វផ្សាយ​ពាណិជ្ជកម្ម​អំពី​ល្បែង​កាស៊ីណូអនឡាញ ​និង​ល្បែង​ភ្នាល់​អនឡាញ ដែល​ជា​ល្បែងស៊ីសង​ខុសច្បាប់​តាម​ទំព័រហ្វេសប៊ុក និងប្រព័ន្ធ​តេលេក្រាម ដោយ​ក្នុងនោះមាន​ចំនួន ២៥ទំព័រ ដូចជាឈ្មោះ(១)Afb883 Gaming (២)Khmer888 VIP (៣)Afb883KH (៤)Fafa9898 Khmer v2 (៥)Skin Color (៦)Fafa24H ផេកផ្លូវកា K1 (៧)Fafa796. com 2 (៨)Angkor puro (៩)Qka88 (១0)FAST 99 KH (១១)Cambo Joker123 -CS02 (១២)Erminio Langford (១៣)Daily News – AVFC KH fan (១៤)Genesis Media (១៥)BJ88 Casino (១៦)អនឡាញកំពុងសោម (១៧)Vina 24h lottery (១៨)Melody Stevenson (១៩)Lotto19 Luxury (២០)Lottery company Vina 24h (២១)Bet168 (២២)Win Win 01 (២៣)Luy02 KH (២៤)Sadf និង (២៥)Loyhacker v3 គឺ​ជា​សកម្មភាព​ល្មើស​នឹង​ច្បាប់​ ស្តី​ពី​ការ​គ្រប់​គ្រង​ល្បែង​ពាណិជ្ជកម្ម និងច្បាប់ស្ដីពីការបង្រ្កាបល្បែងស៊ីសង។

គ.ល.ក. បានបន្ថែមទៀតថា ការ​ផ្សព្វផ្សាយនេះ បាន​បង្ក​ឱ្យ​មាន​ផល​ប៉ះពាល់​យ៉ាង​ខ្លាំង​ដល់​សន្តិសុខ សណ្តាប់ធ្នាប់ សីលធម៌សង្គម និង​ជីវភាព​រស់​នៅ​របស់​ប្រជាពលរដ្ឋ។

អាជ្ញាធរមានសមត្ថកិច្ចបាននឹងកំពុងតាមដាន ស្រាវជ្រាវ និង​ចាត់​វិធានការ​បង្ក្រាប​លើ​បុគ្គល​ផ្សព្វផ្សាយ​ល្បែង អ្នកដំណើរការ អ្នកលេង និងអ្នកពាក់ព័ន្ធទៅនឹងល្បែងស៊ីសងខុសច្បាប់​។ អាស្រ័យហេតុនេះ សូម​សាធារណជន​ទាំងអស់​ជ្រាប​ជា​ព័ត៌មាន និង​ជៀសវាង​ការ​ចូលរួម​រាល់​សកម្មភាពល្បែងស៊ីសង​ខុស​ច្បាប់​ទាំង​នេះ៕