ឆ្លងចរន្តឆេះរថយន្ត ២ គ្រឿងនៅក្រុងបាត់ដំបង ផ្អើលសមត្ថកិច្ចទាំងយប់

រថយន្តចំនួន ២ គ្រឿងដែលម្ចាស់ចតនៅក្នុងរោងខាងមុខផ្ទះ ត្រូវបានអណ្ដាតភ្លើងឆាបឆេះបង្កការភ្ញាក់ផ្អើលទាំងយប់ ដោយសារតែការឆាបឆេះនេះបានកើតឡើងទៅលើរថយន្តចំនួន ២ គ្រឿងក្នុងពេលតែមួយ។

តាមរបាយការណ៍របស់សមត្ថកិច្ចបានបញ្ជាក់ថា ហេតុការណ៍ដែលបង្កឲ្យមានការភ្ញាក់ផ្អើលនេះបានកើតឡើងនាថ្ងៃទី ២៩ ខែមីនា ឆ្នាំ ២០២៤ វេលាម៉ោងប្រហែល ៩ និង ១៥ នាទី នៅត្រង់ចំណុចភូមិ ព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

ករណីអគ្គិភ័យនេះដែរ បានបង្កឲ្យឆេះរថយន្តចំនួន ២ គ្រឿង ក្នុងពេលតែមួយដែលរថយន្តទាំងនេះជាកម្មសិទ្ធិ របស់ឈ្មោះ ស្រី ណី ភេទ ស្រី អាយុ ៣៧ឆ្នាំ រស់នៅក្នុងភូមិឃុំកើតហេតុខាងលើ។ ភ្លាមៗនោះ កម្លាំងការិយាល័យបង្ការពន្លត់អគ្គិភ័យបានចេញរថយន្តយ៉ាងបន្ទាន់ដើម្បីជួយអន្តរាគមន៍បាញ់ពន្លត់និងទប់ស្កាត់មិនឲ្យរីករាលដាលប៉ះពាល់ដល់លំនៅដ្ឋាន។

ក្រោយការត្រួតពិនិត្យដើម្បីរកមូលហេតុ  គឺបណ្ដាលមកពីឆ្លងចរន្តអគ្គិសនី(ឆ្លងប្រព័ន្ធភ្លើងរថយន្ត) ដោយរថយន្តទាំងពីរនេះគឺមួយគ្រឿងឆេះខ្ទេចទាំងស្រុង និងមួយគ្រឿងជាតិឆេះប្រមាណ ៤០% តែប៉ុណ្ណោះ ហើយក៏មិនបណ្ដាលឱ្យប៉ះពាល់ដល់ជីវិតមនុស្ស ឬសត្វឡើយ ៕

អត្ថបទ ៖សោ និយមរ័ត្ន