ឆេះព្រៃរបោះ រាលដាលចូលដល់ចំការចេកនិងចំការសណ្ដែកក្បែរភូមិ សមត្ថកិច្ចសន្និដ្ឋាន “មានអ្នកលួចដុត”

ព្រៃរបោះមួយកន្លែង ត្រូវបានអគ្គីភ័យឆាបឆេះរហូតរាលដាលចូលដល់​ចំការចេកនិងចំការសណ្ដែកក្បែរភូមិ ដែលបង្កការភ្ញាក់ផ្អើលដោយសារតែខ្លាចអណ្ដាតភ្លើងរាលដល់លំនៅឋានរបស់ប្រជាពលរដ្ឋ។

យោងតាមរបាយការណ៍របស់សមត្ថកិច្ចបានឲ្យដឹងថា ហេតុការណ៍នៃភ្លើងឆេះព្រៃនេះ បានកើតឡើងកាលពីថ្ងៃទី ១៩ ខែ មេសា ឆ្នាំ ២០២៤ វេលាម៉ោង ៥ ល្ងាច ស្ថិតនៅចំណុចក្រុមទី៩ ភូមិបេង ឃុំអន្លង់វិល ស្រុកសង្កែ ខេត្តបាត់ដំបង។

ករណីអគ្គិភ័យនេះដែរបានបង្កឲ្យឆេះព្រៃ រាលចូលចំការចេកនិងចំការសណ្តែកជាច្រើនកន្លែងរបស់ប្រជាពលរដ្ឋ។ ភ្លាមៗដែរក្រុមពន្លត់អគ្គីភ័យបានចេញរថយន្តប្រតិបត្តិការបាញ់ពន្លត់ និងទប់ស្កាត់មិនឲ្យរាលដាលចូលដល់ភូមិនិងលំនៅដ្ឋានរបស់ប្រជាពលរដ្ឋ។ 

ក្នុងរយៈពេលប៉ុន្មានម៉ោងសមត្ថកិច្ចបានគ្រប់គ្រងស្ថានការណ៍បាន 100%។ រីឯមូលហេតុ គឺសមត្ថកិច្ចជំនាញបានធ្វើការសន្និដ្ឋានថា អាចមានជនមិនស្គាល់មុខលួចដុត ហើយម្យ៉ាងទៀតបច្ចុប្បន្នជារដូវក្តៅទើបធ្វើឲ្យភ្លើងឆាតឆេះមានសន្ទុះ​លឿន​បំផុត៕

អត្ថបទ៖ សោ និយមរ័ត្ន