សន្តិសុខសង្គម

ឧកញ៉ា ម៉ុង ឫទ្ធី ប្រកាសខាតលុយជាង៣០ម៉ឺនដុល្លារពីការឆេះចម្ការកៅស៊ូនៅខេត្តកោះកុង

បានផុស

៩ ខែ មុន

នៅ

ថ្ងៃអង្គារ ៣០ មេសា ២០២៤

ដោយ

លោកបណ្ឌិតឧកញ៉ា ម៉ុង ឫទ្ធី ដែលជាអ្នកជំនួញមួយរូប និងជាម្ចាស់ក្រុមហ៊ុន ម៉ុង ឫទ្ធីគ្រុប នៅព្រឹកថ្ងៃទី៣០ ខែមេសា ឆ្នាំ២០២៤នេះ បានប្រកាសពីការខាតបង់ទឹកប្រាក់រហូតដល់ជាង៣០ម៉ឺនដុល្លារសហរដ្ឋអាមេរិក ដោយសារភ្លើងឆេះចម្ការកៅស៊ូប្រមាណជាង២០ហិកតា នៅខេត្តកោះកុង។ ជាមួយនឹងការប្រកាសខាតបង់ទឹកប្រាក់ដ៏ច្រើនសន្ធឹកសន្ធាប់នេះ លោកបណ្ឌិតឧកញ៉ា ម៉ុង ឫទ្ធី ក៏បានលើកឡើងថា ករណីនេះក៏បណ្ដាលឲ្យកម្មករ និងបុគ្គលឹករបស់ក្រុមហ៊ុនជាច្រើនបាត់ការងារផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសំណេរដែលបង្ហោះនៅលើផេកផ្លូវការរបស់លោកឧកញ៉ា ម៉ុង ឫទ្ធី នៅព្រឹកថ្ងៃទី៣០ ខែមេសា នេះ ហេតុការណ៍ដែលបណ្ដាលឲ្យកើតមានករណីអគ្គិភ័យឆេះចម្ការកៅស៊ូរហូតដល់ជាង២០ហិកតា និងធ្វើឲ្យខូចខាតដើមកៅស៊ូប្រមាណជា ១១.២០០ដើមនេះ គឺផ្ដើមចេញពីប្រជាពលរដ្ឋកាប់រានព្រៃដុតដោយមិនមានការប្រុងប្រយ័ត្នបណ្តាលអោយឆាបឆេះរាលដាលមកចំការកៅស៊ូតែម្តង។

តាមសំណេររបស់លោកឧកញ៉ា ម៉ុង ឫទ្ធី បានសរសេររៀបរាប់ថា វេលាម៉ោង១រសៀល ថ្ងៃចន្ទ ទី២៩ ខែមេសា ឆ្នាំ២០២៤ មានករណីភ្លើងឆេះចម្ការកៅស៊ូរបស់ក្រុមហ៊ុន ម៉ុង ឫទ្ធីគ្រុប អស់ប្រមាណជាជាង២០ហិកតា សរុបដើមកៅស៊ូដែលឆេះខូចខាតអស់ចំនួន ១១.២០០ដើម។ សំណេរដដែលបន្ថែមថា ករណីនេះបានកើតឡើងនៅចំណុចព្រំប្រទល់ឃុំកែវផុស ស្រុកស្ទឹងហាវ និងឃុំជ្រោយស្វាយ ស្រុកស្រែអំបិល ខេត្តកោះកុង បណ្តាលមកពីប្រជាជនកាប់រានព្រៃដុតដោយមិនមានការប្រុងប្រយ័ត្ន បណ្តាលអោយឆាបឆេះរាលដាលមកចំការកៅស៊ូតែម្តង។ ករណីនេះបណ្ដាលអោយបាត់ការងាររបស់បុគ្គលឹក កម្មករ និងទ្រព្យសម្បត្តិបើគឹតជាថវិការអស់ប្រមាណជាជាងបីរយពាន់ដុល្លារសហរដ្ឋអាមេរិក៕

អត្ថបទ៖ សុខុម