សន្តិសុខសង្គម

ឆ្លងចរន្តអគ្គិសនីឆេះ អស់កញ្ចុះ៦ក្នុងភោជនីយដ្ឋានម្ហូបធម្មជាតិ

បានផុស

១១ ខែ មុន

នៅ

ថ្ងៃសៅរ៍ ៤ ឧសភា ២០២៤

ដោយ

ភ្នំពេញ ៖ ភោជនីយដ្ឋានមួយកន្លែងមាន យីហោ ម្ហូបធម្មជាតិ ត្រូវបានអគ្គិភ័យឆាបឆេះ យ៉ាងសន្ធោសន្ធៅបង្កការភ្ញាក់ផ្អើលដល់ប្រជាពលរដ្ឋរស់នាំគ្នាជួបពន្លត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះអគ្គីភ័យនេះបានកើតឡើងកាលពីវេលាម៉ោង០៥ និង៣០នាទីល្ងាចថ្ងៃទី០៤ ខែឧសភា ឆ្នាំ២០២៤ ដែលស្ថិតនៅតាមបណ្ដោយផ្លូវបេតុង ភូមិព្រៃទា១ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានបានឲ្យដឹងថា នៅមុនពេលកើតហេតុគេបានឃើញមានផ្សែងលាយឡំនិងអណ្តាតភ្លើងឆាបឆេះយ៉ាងសន្ធោសន្ធៅចេញពី កញ្ចុះមួយទៅកញ្ចុះមួយភ្លាមៗនោះបានប្រជាពលរដ្ឋ យកបំពង់ពន្លត់អគ្គីភ័យជួយបាញ់ពន្លត់ ប៉ុន្តែមិនអាចគ្រប់គ្រងបានដោយសារតែកញ្ចុះត្រូវបានអណ្ដាតភ្លើងឆាបឆេះសន្ធោសន្ធៅយ៉ាងលឿន។ ពេលនោះអាជ្ញាធរមូលដ្ឋានក៏បានទំនាក់ទំនងទៅនឹងការិយាល័យបង្ការនិងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញនិង រថយន្តពន្លត់អគ្គិភ័យ អង្គភាព៧១១ កងពលតូចលេខ៧០ បានចេញរថយន្តព្រមគ្នា ដើម្បីជួយអន្តរាគមន៍បាញ់ទឹកពន្លត់។

មន្ត្រីជំនាញបានឲ្យដឹងថា ក្នុងហេតុការណ៍នេះមានផលលំបាកដោយសារតែទីតាំងនៃការឆាប់ឆេះមានផ្លូវតូចចង្អៀតហើយនិងស្ថានភាពនៃការឆាប់ឆេះអណ្ដាតភ្លើងឆាបឆេះនៅកញ្ចុះនៅក្នុងហាងដោយមានការរាលដាលយ៉ាងឆាប់រហ័សប៉ុន្តែសំណាងល្អមិនបណ្ដាលឲ្យមានមនុស្សរករបួសនិងរាលដាលដល់ផ្ទះពលរដ្ឋជិតខាងឡើយ។

ក្នុងប្រតិបត្តិការនេះ មន្ត្រីជំនាញបានឲ្យដឹងថា ក្នុងភោជនីយដ្ឋានខាងលើគឺមានកញ្ចុះចំនួន០៩ និងត្រូវបានឆាប់ឆេះអស់ចំនួន០៦។ ចំពោះមូលហេតុនោះគឺ៤បណ្ដាលមកពីឆ្លងចរន្តអគ្គិសនី៕

ដោយ ៖ សុខា