ស្នងការរាជធានីបញ្ជាក់ថា ករណីស្ត្រីគ្រង​ឯកសណ្ធានជានគរបាល គឺជាជនឆបោក និងស្នើឲ្យជនរងគ្រោះមកដាក់ពាក្យបណ្ដឹងជាបន្ទាន់

បន្ទាប់ពីមានការចុះផ្សាយនៅលើបណ្ដាញសង្គមពាក់ព័ន្ធករណីស្ត្រីម្នាក់អះអាងថាខ្លួនជាមន្ត្រីនគរបាល និងជាកូនចៅរបស់លោកស្នងការរាជធានីភ្នំពេញ ហើយដើរបោកប្រាស់លុយកាក់ក៏ដូចសម្ភារមួយចំនួនរួចមក នៅព្រឹកថ្ងៃទី១១ ខែឧសភា ឆ្នាំ២០២៤នេះ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ បានបញ្ជាក់ថា ស្ត្រីរូបនោះមិនមែនជាមន្ត្រីនគរបាលនោះទេ ពិតជាជនឆបោកប្រាកដមែន។

ជាមួយនឹងការបដិសេធនេះ លោកឧត្ដមសេនីយ៍ឯកស្នងការក៏បានស្នើឲ្យជនរងគ្រោះក្នុងករណីនេះ យកឯកសាមកដាក់បណ្ដឹងនៅអធិការដ្ឋាន ឬនៅស្នងការដ្ឋាននគរបាលរាជធានីភ្នំពេញជាបន្ទាន់ ដើម្បីសមត្ថកិច្ចអនុវត្តតាមនិតិវិធី។

តាមការបញ្ជាក់របស់លោកឧត្តមសេនីយ៍ឯក ជួន ណារិន្ទ បានលើកឡើងថា រូបថតឯកសណ្ធាននគរបាលដែលស្រ្តីនោះមាន គឺឈ្មោះ ស៊ុន ស៊ីន គឺជាមនុស្សប្រុស មានឋានន្តរសក្ដិ វរសេនិយ៍ឯក បម្រើការងារនៅអគ្គនាយកដ្ឋានអន្តោប្រវេសន៍។ ចំពោះអត្តលេខ 86343 គឺជាមន្ត្រីនគរបាលនាយកដ្ឋានព្រហ្មទណ្ឌ ភេទប្រុស ឋានន្តរសក្ដិ វរសេនិយ៍ត្រី។

លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងនៅរសៀលថ្ងៃទី១១ឧសភានេះថា ករណីនេះ កម្លាំងសមត្ថកិច្ចនៃស្នងការដ្ឋាននគរបាលរាជធានីភ្នំពេញ បាននិងកំពុងស្រាវជ្រាវរកអត្តសញ្ញាណស្ត្រីសង្ស័យរូបនោះដើម្បីយកមកអនុវត្តតាមនិតិវិធីច្បាប់ផងដែរ៕