ស្ទាក់ចាប់រថយន្ដដឹកសាច់បង្កកខូចគុណភាពជាង៥០០គីឡូនាំចូលគ្មានប្រភពច្បាស់លាស់

កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តពោធិ៍សាត់ សហការជាមួយកម្លាំងជំនាញបសុពេទ្យនៃមន្ទីរកសិកម្មរុក្ខាប្រម៉ាញ់ និងនេសាទខេត្ត បានស្ទាក់ចាប់រថយន្ដមួយគ្រឿងដែលលួចដឹកសាច់សត្វបង្កកខូចគុណភាពជាង៥០០គីឡូក្រាមនាំចូលគ្មានប្រភពច្បាស់លាស់យកទៅដុតកម្ទេចចោល។

ប្រតិបត្តិការស្ទាក់ចាប់នេះបានធ្វើឡើងកាលពីយប់ថ្ងៃទី១៣ ខែឧសភា ឆ្នាំ២០២៤ នៅចំណុចលើផ្លូវជាតិលេខ៥ មុខក្លោងទ្វារ វត្តមណីរតនារាម​ ស្ថិតក្នុងភូមិថ្នល់បំបែក សង្កាត់រលាប ក្រុងពោធិ៍សាត់។ ក្នុងប្រតិបត្តិការនេះ កម្លាំងជំនាញបានស្ទាក់រថយន្ដម៉ាក តូយ៉ូតា ស៊ីណា ពណ៌ស ពាក់ស្លាកលេខ បាត់ដំបង 2C-5949 និងរកឃើញគ្រឿងក្នុងសត្វ និងសាច់បង្កកខូចគុណភាព ប៉ះពាល់ដល់សុខភាពមានដូចជា អណ្តាតជ្រូក ៤២ថង់ ស្មើនឹង​២១០គីឡូក្រាម ពោះគោសម្អាតរួច ២៤ថង់ ស្មើនឹង ១៥០គីឡូក្រាម ជើងជ្រូក ៩៥គីឡូក្រាម ជង្គង់មាន់ ទា ដកឆ្អឹងរួច ៦៧គីឡូក្រាម។

តាមរបាយការណ៍របស់ស្នងការដ្ឋាននគរបាលខេត្តពោធិ៍សាត់ ការនាំចូលសាច់បង្កកនេះ គឺគ្មានលិខិតអនុញ្ញាត គ្មានប្រភពច្បាស់លាស់ ខូចគុណភាព ដែលធ្វើប៉ះពាល់ដល់សុខភាពដល់អ្នកប្រើប្រាស់។

ក្រោយពីត្រួតពនិត្យ និងធ្វើកំណត់ហេតុ កម្លាំងជំនាញបានយកសាច់បង្កកទាំងនោះធ្វើការដុតកម្ទេចចោលតាមវិធានបសុពេទ្យ៕