សន្តិសុខសង្គម
អ្នកជំនួញដីធ្លីម្នាក់ បើករថយន្តបុកបុរសវ័យចំណាស់ជិះម៉ូត អូសជាច្រើនម៉ែត្រស្លាប់ សុំសងជំងឺចិត្តត្រឹម២លានរៀល
សៀមរាប ៖ ប្រភពពីពលរដ្ឋបានឱ្យដឹងថា មានករណីរថយន្តមួយគ្រឿងពណ៌ខ្មៅបើកបរដោយតៃកុងឡានជាអ្នកជំនួញដីធ្លីដ៏មានឥទ្ធិពលម្នាក់នៅខេត្តសៀមរាប បានបុកម៉ូតូអូសជាច្រើនម៉ែត្របណ្ដាលឱ្យបុរសវ័យចំណាស់ម្នាក់ រងរបួសធ្ងន់(បាក់ចង្កេះ)ហើយបានស្លាប់ ខណៈបញ្ជូនដល់មន្ទីរពេទ្យ។
![](https://www.kampucheathmey.com/wp-content/uploads/2024/05/photo_2024-05-29_20-55-09-768x1024.jpg)
ឯជនបង្កបានព្យាយាមបញ្ចប់រឿងដោយសំណងជំងឺចិត្តត្រឹម២លានរៀល តែគ្រួសាររងគ្រោះមិនព្រមដោយសុំត្រឹមតែ៨លានរៀលដើម្បីចេញថ្លៃព្យាបាលនិងទុកធ្វើបុណ្យសពឪពុកតែប៉ុណ្ណោះ។
សាក្សីនៅកន្លែងកើតហេតុបានឱ្យដឹងថា នៅវេលាម៉ោង៧និង៣០នាទីថ្ងៃទី២៨ ខែឧសភា ឆ្នាំ២០២៤ ចំណុចផ្លូវលេខ១៥ក្នុងបុរីសៀងណាំ ភូមិខ្នារ សង្កាត់ជ្រាវ ក្រុងសៀមរាប មានហេតុឃើញរថយន្តបង្កបានបោះពួយលឿនជ្រុលទៅបុកម៉ូតូដែលកំពុងឆ្លងផ្លូវបណ្ដាលឱ្យរងរបួសធ្ងន់(បាក់ចង្កេះ)ដោយគ្មានអ្នកបញ្ជូនទៅមន្ទីរពេទ្យអស់រយៈពេលជាងមួយម៉ោង ហើយបានស្លាប់ ខណៈបញ្ជូនដល់មន្ទីរពេទ្យ បានប្រហែលជាង២ម៉ោង។
សាក្សីបានឱ្យដឹងថា ដោយសារឃើញគ្រួសារគាត់ក្រីក្រ ទើបគ្រួសារអ្នកជំនួញដីធ្លីរូបនោះធ្វើទង្វើមិនសមរម្យ ក្អេងក្អាង ពោលគឺបុកហើយនៅឈរមើលជនរងគ្រោះដែលកំពុងដួលស្តូកស្តឹងទៀតផង។
កូនប្រុសរបស់ជនរងគ្រោះបានឱ្យដឹងនៅព្រឹកថ្ងៃទី២៩ ខែឧសភាថា ឪពុករបស់ខ្លួនមានឈ្មោះគល់ ហ៊ៅ អាយុ៦៤ឆ្នាំ មុខរបរឃ្វាលគោឱ្យមេការក្នុងបុរីសៀងណាំ និងគោរបស់គាត់ខ្លះ ហើយបច្ចុប្បន្នក្រុមគ្រួសារបានរៀបចំធ្វើពិធីបុណ្យសពឱ្យឪពុករបស់ខ្លួននៅភូមិព្រៃក្រូច សង្កាត់ក្របីរៀល ក្រុងសៀមរាប ទៅតាមគន្លងប្រពៃណី។
បន្ទាប់ពីកើតហេតុមួយសន្ទុះធំ ក៏បញ្ជូនឪពុករបស់ខ្លួនទៅព្យាបាលនៅមន្ទីរពេទ្យបង្អែកខេត្តសៀមរាប។ តែបន្ទាប់ពីព្យាបាលអស់ជាង២ម៉ោងឪពុករបស់ខ្លួនក៏ស្លាប់បាត់បង់ជីវិតនៅមន្ទីរពេទ្យតែម្ដង។ កូនជនរងគ្រោះបន្តទៀតថា នៅថ្ងៃបន្ទាប់ គឺថ្ងៃទី២៩នេះឃើញមានភាគីជនបង្កមកសម្រួលដល់កន្លែងបុណ្យសពដែរ ដោយគ្រួសារជនបង្កហ៊ានជួយបង់សំណងជំងឺចិត្តត្រឹមតែ២លានរៀលប៉ុណ្ណោះ ទើបការសម្របសម្រួលគ្នានេះមិនអាចបញ្ចប់ទៅបានដោយសារតែគ្រួសារជនរងគ្រោះថា លុយប៉ុណ្ណឹងគ្រាន់ចូលពេទ្យអស់បាត់ទៅហើយ ចុះទម្រាំថ្លៃធ្វើបុណ្យទៀតនោះវាមិនគ្រប់ទេ ហើយពួកគាត់ស្នើសុំ៨លានរៀលដើម្បីទុកធ្វើបុណ្យសព។
![](https://www.kampucheathmey.com/wp-content/uploads/2024/05/photo_2024-05-29_20-55-09-2-768x1024.jpg)
ពាក់ព័ន្ធនឹងករណីនេះដែរ សមត្ថកិច្ចនគរបាលចរាចរណ៍បានឱ្យដឹងថា បន្ទាប់ពីទទួលបានព័ត៌មានករណីគ្រោះថ្នាក់ចរាចរណ៍ខាងលើ កម្លាំងនគរបាលជំនាញបានចុះទៅដល់កន្លែងកើតហេតុ។
ពេលនោះក្រុមគ្រួសារជនបង្កនិងគ្រួសារជនរងគ្រោះបានប្រាប់សមត្ថកិច្ចថា កំពុងដោះស្រាយគ្នាជិតត្រូវហើយ ដោយសុំឲ្យសមត្ថកិច្ចកុំធ្វើរបាយការណ៍អី ព្រោះនឹងសម្រួលគ្នានាពេលឆាប់ៗនេះហើយ ឃើញដូចនោះទើបសមត្ថកិច្ចត្រឡប់ទៅគោលដៅវិញ។
ចុងក្រោយគ្រួសាររងគ្រោះបានសំណូមពរទៅសមត្ថកិច្ចពាក់ព័ន្ធ ជាពិសេសស្ថាប័នតុលាការខេត្តសៀមរាប មេត្តាជួយរកភាពយុត្តិធម៌ និងផ្តល់សំណងសមរម្យដល់គ្រួសារពួកគាត់ផង ហើយសុំកុំអាងខ្សែពេក។
ពាក់ព័ន្ធគ្រោះថ្នាក់ចរាចរណ៍ខាងលើនេះ មន្ត្រីផ្នែកច្បាប់បានឱ្យដឹងថា ករណីបុកបណ្តាលឱ្យរបួសធ្ងន់បាក់ដៃ,បាក់ជើង និងអាចឈានដល់ស្លាប់ ក្នុងនាមជាមន្ត្រីនគរបាលយុត្តិធម៌ ត្រូវធ្វើអ្វី ពួកគាត់គួរតែដឹងហើយ មិនបាច់ចាំគាត់ធ្វើអត្ថាធិប្បាយនោះទេ។ ហើយសំណុំរឿងគ្រោះថ្នាក់ចរាចរណ៍បែបនេះ ក៏មិនគួរទុកបណ្តែតបណ្តោយឱ្យជនបង្ករួចពីសំណាញ់ច្បាប់នោះដែរ៕
ដោយ ៖ ជុន កុសល
![](https://www.kampucheathmey.com/wp-content/uploads/2024/05/photo_2024-05-29_12-04-29-768x1024.jpg)
-
សន្តិសុខសង្គម៤ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
KPT+៦ ថ្ងៃ ago
ប្រវត្តិដ៏គួរឱ្យចាប់អារម្មណ៍របស់ វត្តចំណាស់ទាំង ៧ ក្នុងខេត្តបាត់ដំបង
-
សន្តិសុខសង្គម៤ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៤ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៣ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៤ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+១ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ១ សប្តាហ៍ ago
ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ