នគរបាលខេត្តតាកែវឃាត់ខ្លួនក្មេងទំនើងម្នាក់ទៀត ករណីជិះម៉ូតូដេញវាយគ្នានៅផ្សារអង្គតាសោម

នាល្ងាចថ្ងៃទី២៩ ខែឧសភា ឆ្នាំ២០២៤ កម្លាំងនគរបាលជំនាញនៃអធិការដ្ឋាននគរបាលស្រុកត្រាំកក់ បានស្រាវជ្រាវកំណត់មុខសញ្ញារហូតឈានដល់ការឃាត់ខ្លួនបានជនសង្ស័យចំនួនម្នាក់ ក្នុងចំណោម០៧នាក់(២ក្រុម) ពាក់ព័ន្ធករណីជិះម៉ូតូដេញវាយគ្នាបង្កភាពអសន្តិសុខតាមផ្លូវសាធារណៈ នៅផ្លូវជាតិលេខ៣ ម្តុំផ្សារអង្គតាសោម ស្រុកត្រាំកក់ កាលពីរសៀលថ្ងៃទី២៨ ខែឧសភា ឆ្នាំ២០២៤។

ជនសង្ស័យមានឈ្មោះ ជា ថាវិន ភេទប្រុសអាយុ១៧ឆ្នាំ មានទីលំនៅបច្ចុប្បន្នភូមិត្រពាំងកប្បាស ឃុំតាភេម ស្រុកត្រាំកក់ ជាសិស្សរៀនថ្នាក់ទី 11A នៃវិទ្យាល័យតេជោ ហ៊ុន សែន អង្គតាសោម។ តាមរបាយការណ៍របស់ស្នងការដ្ឋាននគរបាលខេត្តតាកែវ បក្ខពួកទាំងពីរក្រុមដែលធ្វើសកម្មភាពជិះម៉ូតូដេញវាយគ្នានេះ សមត្ថកិច្ចបានក្តាប់មុខសញ្ញាអស់ហើយ និងកំពុងធ្វើសាវតាជាតិកសាងសំណុំរឿងតាមនីតិវិធី។

សូមជម្រាបថា នារសៀលថ្ងៃទី២៩ឧសភានេះដែរ កម្លាំងអាវុធហត្ថខេត្តតាកែវ ក៏បានស្រាវជ្រាវឈានដល់ការឃាត់ខ្លួនជនសង្ស័យម្នាក់ ក្នុងចំណោមបក្ខពួកមួយចំនួន និងបានកសាងសំណុំរឿងចាត់ការតាមនីតិវិធីផងដែរ។

ក្រុមជនសង្ស័យបានជិះម៉ូតូប្រដេញវាយគ្នា​ប្រដាប់ដោយកាំបិត ពូថៅ យ៉ាងអនាធិបតេយ្យ នៅចំណុចខាងមុខផ្សារអង្គតាសោម លើបណ្ដោយផ្លូវជាតិលេខ៣ ស្ថិតនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ កាលពីថ្ងៃទី២៨ ខែឧសភា ឆ្នាំ២០២៤៕

អត្ថបទ៖ សុខុម