ឃាត់ខ្លួន ៩ នាក់ ចុះ​បង្ក្រាបអ្នកញៀនល្បែងជល់មាន់​នៅស្រុក​កងមាស

បន្ទាប់ពីទទួលបានបទបញ្ជា​ពី​លោកឧត្តមសេនីយ៍ត្រី ថេង ឆេងលីម មេបញ្ជាការកងរាជអាវុធហត្ថខេត្តកំពង់ចាម និងដោយ​មានការសម្របសម្រួលនីតិវិធីពីលោក ឈឹម បញ្ញា ព្រះរាជអាជ្ញារងអមសាលាដំបូងខេត្ត នៅវេលាម៉ោង ១១.៣០​នាទី ថ្ងៃទី០១ ខែមិថុនា ឆ្នាំ២០២៤ កម្លាំងជំនាញកងរាជអាវុធហត្ថខេត្តសហការជាមួយកម្លាំងមូលដ្ឋាន​កងរាជអាវុធហត្ថស្រុកកងមាស ដឹកនាំដោយលោក វរសេនីយ៍ទោ សែម ឃាង ចុះបង្ក្រាបល្បែងស៊ីសងខុសច្បាប់ (ជល់មាន់ភ្នាល់ដាក់ប្រាក់) នៅចំណុចភូមិអង្គរបានទី១ ឃុំអង្គរបាន ស្រុកកងមាស ខេត្តកំពង់ចាម។

ក្នុងកិច្ចប្រតិបត្តិការ កម្លាំងបានឃាត់ខ្លួនជនសង្ស័យចំនួន ០៩ នាក់ និងសម្ភារៈបទល្មើសមួយចំនួនធំ រួមមាន.ម៉ូតូចំនួន ២២ គ្រឿង មាន់រស់ចំនួន ០៥ ក្បាល ជញ្ជីងចំនួន ០១ គ្រឿង ស្គត់រុំជើងមាន់ចំនួន ២៨ ដុំ ខ្នាយមាន់ដែកចំនួន ០៦ គូប្រាក់រៀលចំនួន ៣៩០,០០០ រៀល ។

លោកវរៈសេនីយ៍ទោ បានបន្ថែមឲ្យដឹងទៀតថា បច្ចុប្បន្នជនសង្ស័យនិងវត្ថុតាងខាងលើបញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕