ម្ចាស់ហាងទូរស័ព្ទនៅផ្សារមេមត់ទទួលបានទូរស័ព្ទមួយទឹកគ្រប់ចំនួនពីមន្ត្រីគយវិញ ខណៈអីវ៉ាន់ថ្មីនៅត្រួតពិនិត្យបន្ត

ម្ចាស់ហាងលក់ទូរស័ព្ទនៅផ្សារមេមត់ ខេត្តត្បូងឃ្មុំ ដែលត្រូវមន្ត្រីគយចល័តតំបន់៦ចុះចាប់ និងដកហូតជាង១ពាន់គ្រឿងកាលពីកន្លងទៅ ត្រូវបានមន្ត្រីជំនាញប្រគល់ជូនមកវិញហើយ កាលពីថ្ងៃទី៤មិថុនា ម្សិលមិញ តែការប្រគល់ជូននេះ គឺប្រគល់ជូនតែអីវ៉ាន់មួយទឹកតែប៉ុណ្ណោះ ខណៈអីវ៉ាន់នាំចូលថ្មីត្រូវរង់ចាំការត្រួតពិនិត្យបន្តសិន។ នេះបើតាមការបញ្ជាក់ពី​ម្ចាស់ហាងលក់ទូរស័ព្ទទំនើប រដ្ឋា មេមត់ បានប្រាប់ កម្ពុជាថ្មី នៅព្រឹកថ្ងៃទី៥មិថុនានេះ។

ម្ចាស់ហាងលក់ទូរស័ព្ទទំនើប រដ្ឋា មេមត់ បានប្រាប់ឲ្យដឹងថា នៅព្រឹកថ្ងៃទី៥ មិថុនានេះ លោកបានដាក់អីវ៉ាន់បើកលក់ជាធម្មតាវិញហើយ បន្ទាប់ពីទទួលបានអីវ៉ាន់ពីមន្ត្រីគយដែលបានដកហូតកាលពីកន្លងទៅ។ លោកបញ្ជាក់ថា អីវ៉ាន់ដែលទទួលបានមកវិញនេះ គឺជាទូរស័ព្ទមួយទឹកដែលទិញដូរនៅក្នុងស្រុក ហើយចំពោះអីវ៉ាន់ដែលនាំចូលថ្មីនោះ នៅមិនទាន់បានទទួលមកវិញនោះទេ ត្រូវរង់ចាំមន្ត្រីគយត្រួតពិនិត្យបន្តសិន ហើយក៏នឹងបានមកវិញគ្រប់ចំនួនផងដែរ។ បើតាមម្ចាស់ហាងលក់ទូរស័ព្ទរូបនេះ ការទទួលបានទូរស័ព្ទមកដាក់លក់វិញនេះ គឺដោយមានការសម្របសម្រួលពីភាគីក្រុមហ៊ុន ជាមួយមន្ត្រីគយ។ លោកថា ចំពោះទូរស័ព្ទថ្មីមន្ត្រីគយតម្រូវឲ្យបង់ពន្ធនាំចូល តែការបង់ពន្ធនេះក៏មានការបន្ថូបន្ថយផងដែរ។

ម្ចាស់ហាងលក់ទូរស័ព្ទទំនើប រដ្ឋា មេមត់ បញ្ជាក់បន្ថែមថា ក្រៅពីលោកមានម្ចាស់ហាងទូរស័ព្ទចំនួន២ផ្សេងទៀតក៏ទទួលបានអីវ៉ាន់មកដាក់លក់ជាធម្មតាដូចរូបលោកដែរ ខណៈពេលដែលមិនទាន់ទទួលបានអីវ៉ាន់មកវិញនោះ លោកបើកតែជួសជុលតែប៉ុណ្ណោះ ដើម្បីទទួលបានប្រាក់ខ្លះគ្រាន់បង់ថ្លៃឈ្នួលផ្ទះ៕

អត្ថបទ៖ សុខុម