សមត្ថកិច្ច៖ ភ្លើងឆេះព្រៃលិចទឹក នៅកំពង់ភ្លុកជាង១០ហិកតា ប្រហែលមកពីពលរដ្ឋរកឃ្មុំមិនបានប្រយ័ត្ន

នៅថ្ងៃទី១១ ខែមិថុនា ឆ្នាំ២០២៤ វេលាម៉ោង១៤ និង០០ នាទីមានករណីភ្លើងឆេះព្រៃលិចទឹកប្រមាណជាង១០ហិកតា ស្ថិតនៅខាងជើងភូមិត្នោតកំបុត ឃុំកំពង់ភ្លុក ស្រុកប្រាសាទបាគង ខេត្តសៀមរាប ដែលសមត្ថកិច្ចសន្និដ្ឋានថា ប្រហែលមកពីពលរដ្ឋរកឃ្មុំមិនបានប្រុងប្រយ័ត្ន ទើបធ្វើឱ្យមានករណីឆេះនេះ។

សមត្ថកិច្ចបញ្ជាក់ថា នៅព្រឹកថ្ងៃទី១២ ខែមិថុនា ឆ្នាំ២០២៤ ភ្លើងនៅមានឆេះតិចតួច អាជ្ញាធរកំពុងរកវិធីដើម្បីពន្លត់ ព្រោះព្រៃក្រាសគ្មានផ្លូវ ធ្វើឱ្យពិបាកយករថយន្តពន្លត់អគ្គិភ័យចូល។ សមត្ថកិច្ចបញ្ជាក់ទៀតថា មូលហេតុ គឺដោយសារប្រជាពលរដ្ឋរកឃ្មុំមិនបានប្រយ័ត្នបណ្ដាលអោយឆេះតែម្ដង។

បើតាមសមត្ថកិច្ចបានឲ្យដឹងថា នៅក្នុងហេតុការណ៍នេះ ភ្លើងឆេះព្រៃលិចទឹកអស់ប្រហែល ១០ហិកតា ដែលនៅជិតផ្ទះប្រជាពលរដ្ឋកំពុងរស់នៅ ហើយសមត្ថកិច្ចបានប្រើប្រាស់រថយន្ដពន្លត់អគ្គីភ័យចំនួន ៤គ្រឿង រថយន្ដស្នងការនគរបាល ៣គ្រឿងប្រើប្រាស់ អស់ទឹក១រថយន្ដ រថយន្ដអធិការដ្ឋានស្រុក១គ្រឿងប្រើប្រាស់អស់ទឹក១រថយន្ត គ្រឿងចក្រអាអិចហ្ការចំនួន ២គ្រឿង ត្រាក់ទ័រចំនួន ១គ្រឿង។ ទន្ទឹមនោះ ប្រើប្រាស់កម្លាំងទាំងសមត្ថកិច្ច ប្រជាការពារ និងប្រជាពលរដ្ឋសរុប  ៤៧៥ នាក់ដោយបានប្រើប្រាស់ម៉ាស៉ីនបូមទឹក និងម៉ូទ័របូមទឹក រួមទាំងឧបករណ៍ពន្លត់ភ្លើងព្រៃ របស់សហគមន៍នេសាទ។ រហួតដល់ម៉ោង ២២និង៣៩ នាទីយប់ភ្លើងបានរលត់ទៅវិញបាន ៨០%ហើយ៕

ដោយ៖ ជុន កុសល