ម្ចាស់ហាងមួយនៅឆ្នេរអូរឈើទាលលក់ស្រាបៀរ​មួយកេស៧២ដុល្លារ អាជ្ញាធរខេត្តឲ្យជំនាញពិនិត្យ

អាជ្ញាធរខេត្តព្រះសីហនុ ឲ្យម្ចាស់ហាងលក់ដូរមួយនៅឆ្នេរអូឈើទាល ឈ្មោះ ៨៨៨ ចេញមុខស្រាយ បន្ទាប់ពីមានម្ចាស់គណនីហ្វេសប៊ុកមួយលើកឡើងពីការមិនពេញចិត្តនឹងតម្លៃមុខម្ហូប និងស្រាបៀរថ្លៃមិនអាចទទួលយកបាន។ ជាមួយគ្នានេះ អាជ្ញាធរក៏ស្នើឲ្យមន្ត្រីជំនាញនៃមន្ទីរទេសចរណ៍ខេត្តជួយពិនិត្យ។

យោងតាមខ្លឹមសារដែលបង្ហោះដោយម្ចាស់គណនីហ្វេសប៊ុកមួយបានលើកឡើងថា «លាហើយហាង ៨៨៨ ឆ្នេរអូឈើទាល ស្រាបៀរហនុមាន១កេស ៧២ដុល្លារ ថ្លៃម្លេះ នេះខ្ញុំអ្នកនៅកំពង់សោមផង ថ្លៃដើម២០ដុល្លារ យកចំណេញពាក់កណ្ដាលមិនថាទេ តែនេះថ្លៃជាង KTV ទៀត ពេលសួរទៅចុះត្រឹម៥០ដុល្លារ មិត្តភក្ដិមកលេងពីភ្នំពេញថា ថ្ងៃក្រោយមកលេងទិញអាហារខ្លួនឯងអង្គុយលេងក្រោមដើមឈើវិញល្អជាង»។

បន្ទាប់ពីបានឃើញនូវការលើកឡើងបែបនេះ នៅរសៀលថ្ងៃទី១២មិថុនា នេះ គណនីហ្វេសប៊ុកឈ្មោះ ប្រជាជនខេត្តព្រះសីហនុ បានចោទជាសំនួរថា ម្ចាស់ហាង ៨៨៨ ជួយបកស្រាយឱ្យផង អ្នកកំពុងស្វាគមន៍ភ្ញៀវ ឬដេញភ្ញៀវឱ្យឈប់មក ?

តាមការលើកឡើងរបស់គណនីហ្វេសប៊ុក ប្រជាជនខេត្តព្រះសីហនុ ម្ចាស់ហាងនៅឆ្នេរអូរឈើទាល ពិតជាជួលក្នុងតម្លៃខ្ពស់មែន ប៉ុន្ដែមិនដល់ថ្នាក់ត្រូវលក់ថ្លៃខ្លាំងបែបនេះទេ រួមទាំងម្ហូបផ្សេងៗទៀតផងដែរ។ ជាសិទ្ធសេរីភាពក្នុងការដាក់តម្លៃ ប៉ុន្ដែមិនអាចហួសហេតុពេកទេ៕

អត្ថបទ៖ សុខុម