សមត្ថកិច្ចបន្តចាប់បានរថយន្ត១គ្រឿងលួចនាំចូលសាច់បង្កកខូចគុណភាពជាង១តោន

មន្ត្រីសាខា ក.ប.ប. ខេត្តបន្ទាយមានជ័យ បានសហការជាមួយមន្ត្រីសាខាគយ ចុះចាប់បានរថយន្ត១គ្រឿងបង្កប់សាច់បង្កកចម្រុះដែលមានសារធាតុ គីមី ចំនួនជាង១តោន។

ការបង្ក្រាបសាច់បង្កកនេះបានធ្វើឡើងនៅវេលាម៉ោង៥ល្ងាច ថ្ងៃទី១៥ ខែមិថុនា ឆ្នាំ២០២៤ នៅចំណុចសាលាក្រហម ស្ថិតនៅភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។

បើតាមការអះអាងពីមន្ត្រីចម្រុះបានប្រាប់ឲ្យដឹងថា ផលិតផលទាំងអស់នេះ ត្រូវបានឈ្មួញដឹកចេញពីប្រទេសថៃ លួចដឹកចូលមកប្រទេសកម្ពុជា តាមច្រកតាមច្រករបៀងពុំមានឯកសារយោង និងលិខិតអនុញាតិ ពីជំនាញផលិតកម្ម និងបសុព្យាបាល និងជំនាញជលផលនៃក្រសួងកសិកម្មរុក្ខាប្រមាញ់ និងនេសាទចេញឲ្យទេ។ ផលិតផលទាំងនោះ ភាគច្រើន បានខូចគុណភាពអស់ហើយ ព្រោះតែរក្សាទុកក្នុងសីតុណ្ហភាព ការវេចខ្ចប់មិនសមស្រប និងមានរយ:ពេលច្រើនថ្ងៃទៀតផង។

ចំណែកម្ចាស់រថយន្តដែលទទួលដឹកទំនិញក៏គ្មានការអនុញាតិច្បាប់អ្វីនោះដែរ ហើយក្នុងការបង្ក្រាបនោះសមត្ថកិច្ចចម្រុះ បានដកហូតផលិតផលសាច់បង្កក ដែលមានសាធាតុគីមី ចំនួន១.២៥៤គីឡូក្រាម ក្នុងនោះ ១-ជើងមាន់បង្កក ៨ កេស = ៥៦០ គ.ក ២-កោះមាន់បង្កក ៨ កេស=៦២៤ គ.ក ៣-ខួរគោបង្កក ១ កេស=៥៦ គ.ក ៤-ពោះវៀនជ្រូក ១ កេស=៧០ គ.ក។

ផលិតផលខាងលើ ត្រូវសមត្ថកិច្ចចម្រុះធ្វើកំណត់ហេតុដកហូត រួចស្នើសុំគោលការណ៍និតិវិធីពីលោកព្រះរាជអាជ្ញា នៃអយ្យការអមសាលាដំបូងខេត្តបន្ទាយមានជ័យ ដើម្បីយកទៅដុតកម្ទេចចោលតាមវិធានបសុពេទ្យ នៅព្រឹក ថ្ងៃទី១៦ ខែមិថុនា ឆ្នាំ២០២៤អស់ហើយ៕

អត្ថបទ៖ វ៉ាន់ ណាង