សន្តិសុខសង្គម

សមត្ថកិច្ចឃាត់បុរសម្នាក់ ពាក់ព័ន្ធករណីយកពូថៅវាយអតីតប្រពន្ធ និងអតីតម្ដាយក្មេក នៅស្រុកកងមាស

បានផុស

១៦ វិនាទី មុន

នៅ

ថ្ងៃចន្ទ ២៤ មិថុនា ២០២៤

ដោយ

ភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ សហការជាមួយកម្លាំងជំនាញ ស្នងការដ្ឋាននគរបាលខេត្តកំពង់ចាម ឃាត់ខ្លួនបុរសម្នាក់ ពាក់ព័ន្ធករណី យកពូថៅវាយលើអតីតប្រពន្ធ និងអតីតម្ដាយក្មេក នៅស្រុកកងមាស។

ប្រតិបត្តិការនេះ ធ្វើឡើងនៅវេលាម៉ោង៣និង ៣០នាទី ថ្ងៃទី២៤ ខែ មិថុនា ឆ្នាំ២០២៤ វេលា នៅត្រង់ចំណុច ភូមិស្តៅ ឃុំស្តៅ ស្រុកកងមាស ខេត្តកំពង់ចាម ដោយអនុវត្តតាមបទបញ្ជារបស់លោក ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ចាត់ឲ្យលោកឧត្តមសេនីយ៍ត្រី ខេង ម៉េងឈាង អនុប្រធាននាយកដ្ឋាន បានដឹកនាំកម្លាំងជំនាញនាយកដ្ឋានសហការជាមួយ កម្លាំងជំនាញស្នងការដ្ឋាននគរបាលខេត្តកំពង់ចាម ធ្វើការឃាត់ខ្លួនជនសង្ស័យឈ្មោះ សារី ធារក្ស ភេទប្រុស អាយុ២៤ឆ្នាំ ជនជាតិ ខ្មែរ អាសយដ្ឋាន ភូមិគកក្របី ឃុំរាយប៉ាយ ស្រុកកងមាស ខេត្តកំពង់ចាម ពាក់ព័ន្ធ ករណី ប៉ុនប៉ងឃាតកម្ម។

គួររំលឹកផងដែរ កាលពីថ្ងៃទី២២ ខែមិថុនា ឆ្នាំ២០២៤ មានករណី ប៉ុនប៉ងឃាតកម្ម នៅចំណុចភូមិស្តៅ ឃុំស្តៅ ស្រុកកងមាស ខេត្តកំពង់ចាម លើជនរងគ្រោះឈ្មោះ ព្រួយ សុខណាង ភេទស្រី អាយុ២៣ឆ្នាំ ជនជាតិខ្មែរ និងម្តាយឈ្មោះ វ៉ន វណ្ណើ អាយុ៥២ឆ្នាំ ជនជាតិខ្មែរ បណ្តាល ឱ្យរងរបួសធ្ងន់ធ្ងរ ហើយឈ្មោះ ព្រួយ សំណាង និងឈ្មោះ វ៉ន វណ្ណើ ត្រូវបានបញ្ជូនទៅសង្គ្រោះបន្ទាន់មន្ទីរពេទ្យរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមចម្លើយ សាកសួរបឋមរបស់ជនសង្ស័យ បានសារភាព ថា ខ្លួនបានពូថៅទៅវាយអតីតប្រពន្ធឈ្មោះ ព្រួយ សុខណាង និងអតីតម្តាយក្មេកឈ្មោះ វ៉ន វណ្ណើ ដែលទើបលេងលះគ្នា រយៈពេល ប្រហែល០១ខែ បណ្តាលឱ្យរងរបួសជាទម្ងន់ ពិតប្រាកដមែន។

បច្ចុប្បន្ននគរបាលនាយដ្ឋាន បានប្រគល់ជនសង្ស័យជូននគរបាលខេត្តកំពង់ចាម ដើម្បីធ្វើការសាកសួរ និង កសាងសំណុំរឿង តាមនីតិវិធី៕

ដោយ ៖ សុភា