តុលាការសម្រេចចោទប្រកាន់ឧក្រិដ្ឋជនគ្រឿង​ញៀន៥នាក់ និងឃុំខ្លួនបណ្ដោះអាសន្ន

ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចោទប្រកាន់ និងឃុំខ្លួនបណ្ដោះអាសន្នក្រុមឧក្រិដ្ឋជនគ្រឿងញៀនចំនួន៥នាក់ពីបទ ជួញដូរ រក្សាទុក ដឹកជញ្ជូន និងប្រើប្រាស់ដោយខុសច្បាប់នូវសារធាតុញៀន និងសម្អាតប្រាក់ តាមបទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា ៤០ មាត្រា ៤៥ និងមាត្រា ៤៨ នៃច្បាប់ស្តីពីការត្រួតពិនិត្យគ្រឿងញៀន និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។ នេះបើតាមសេចក្ដីប្រកាសព័ត៌មានរបស់អ្នកនាំពាក្យសាលាដំបូងរាជធានីភ្នំពេញ កាលពីថ្ងៃទី២៥មិថុនា ម្សិលមិញ។

ក្រុមឧក្រិដ្ឋជនទាំង៥នាក់ដែលត្រូវចោទប្រកាន់រួមមាន ១.ឈ្មោះ ហ្វាន យានគួយ (FAN YUAN KUEI) ភេទប្រុស អាយុ ២៦ឆ្នាំ ២.ឈ្មោះ ហ័ង ហឺជៀន (HUANG HE JIAN) ភេទប្រុស អាយុ ៣៥ឆ្នាំ ៣.ឈ្មោះ ហ្វាង នឹងជីន (FANG CHENG JUN) ភេទប្រុស អាយុ ២០ឆ្នាំ ៤.ឈ្មោះ ស៊ូ ឈិនហៅ (HSU CHENG HAO) ភេទប្រុស អាយុ ២៣ឆ្នាំ និង៥.ឈ្មោះ ណូម៉ូរ៉ា សួគីជី (NOMORA SOKICHI) ភេទប្រុស អាយុ ៧៦ឆ្នាំ និងជនត្រូវចោទចំនួន ០៤ នាក់ទៀត រួមទាំងបក្ខពួកកំពុងគេចខ្លួន។

តាមរយៈសេចក្ដីប្រកាសព័ត៌មាន ជនត្រូវចោទបានប្រព្រឹត្តនៅភូមិព្រែករាំង ភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ និងភូមិ៧ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ កាលពីអំឡុងខែមីនា ឆ្នាំ២០២២ រហូតដល់បច្ចុប្បន្ន។

សូមជម្រាបថា ក្រុមឧក្រិដ្ឋជនគ្រឿងញៀនទាំងនេះត្រូវបានកម្លាំងនគរបាលនៃស្នងការដ្ឋាននគរបាលរាជធនីភ្នំពេញបង្ក្រាបបានកាលពីថ្ងៃទី១៦ និងទី១៧ ខែមិថុនា ឆ្នាំ២០២៤ រឹបអូសបានគ្រឿងញៀន និងសារធាតុផ្សំជិត១៤៨​គីឡូក្រាម។ តាមការបញ្ជាក់ពីលោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នការដ្ឋាននគរបាលរាជធានីភ្នំពេញ នៅក្នុងសន្និសីទសារព័ត៌មានកាលពីថ្ងៃទី២១មិថុនា ក្រុមឧក្រិដ្ឋជនគ្រឿងញៀននេះជាឈ្មួញកណ្ដាលនាំចូលតាមច្រកព្រំដែនកម្ពុជាពីប្រទេសជិតខាង យកមកចែកចាយបន្តក្នុងភូមិសាស្ដ្ររាជធានីភ្នំពេញ និងតាមបណ្ដាខេត្តមួយចំនួន៕

អត្ថបទ៖ សុខុម