សន្តិសុខសង្គម

អគ្គិភ័យលេបត្របាក់ផ្ទះប្រជាពលរដ្ឋ បណ្ដាលឱ្យបុរសជាម្ចាស់ផ្ទះស្លាប់ក្នុងភ្នក់ភ្លើង

បានផុស

៣ ខែ មុន

នៅ

ថ្ងៃពុធ ២៦ មិថុនា ២០២៤

ដោយ

ភ្នំពេញ ៖ អគ្គិភ័យឆាបឆេះផ្ទះប្រជាពលរដ្ឋសង់ពីថ្មក្រោយឈើលើយ៉ាងសន្ធោសន្ធៅបណ្ដាលឲ្យបុរសវ័យ៥៦ឆ្នាំម្នាក់ស្លាប់ បង្កឱ្យមានការភ្ញាក់ផ្អើលដល់សមត្ថកិច្ចមូលដ្ឋានរួមទាំងសមត្ថកិច្ចបង្ការពន្លត់អគ្គិភ័យយករថយន្តពន្លត់អគ្គិភ័យជាច្រើនគ្រឿងមកជួយអន្តរាគមន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះអគ្គិភ័យនេះ បានកើតឡើងនៅវេលាម៉ោង ៣រសៀល ថ្ងៃទី២៦ខែមិថុនា ឆ្នាំ២០២៤ នៅត្រង់ចំណុចខាងក្រោយសាលាវិទ្យាល័យ ជាស៊ីម សាមគ្គី សិ្ថតនៅតាមបណ្តោយផ្លូវលេខ៦៥៦ ភូមិ១២ ក្នុងសង្កាត់ទឹកល្អក់ទី០៣ ខណ្ឌទួលគោក រាជធានីភ្នំពេញ។

ជនរងគ្រោះម្ចាស់ផ្ទះដែលត្រូវអគ្គិភ័យផ្តាច់សង្ខារ មានឈ្មោះ សំ សាវិន ភេទ ប្រុស អាយុ៥៦ឆ្នាំ នឹងធ្លាប់មានជំងឺប្រចាំកាយ ផងដែរ។

បើតាមប្រភពពីប្រជាពលរដ្ឋបានឱ្យដឹងថា គេឃើញមានផ្សែងហ៊ុយហ៊ុយខ្មួលខ្មាញ់ ចេញពីជាន់ផ្ទះខាងលើរួមជាមួយនឹង អណ្តាតភ្លើងឆេះយ៉ាងសន្ធោសន្ធៅ ទើបបង្កឱ្យមានការឆោឡោ ផ្អើលដល់ប្រជាពលរដ្ឋ និង សមត្ថកិច្ចចុះមកជួយអន្តរាគមន៍ភ្លាមៗផងដែរ។

ប្រភពពីក្រុមគ្រួសារបានឲ្យដឹងថា ជនរងគ្រោះ ព្រមទាំងកូនចៅ បានអង្គុយលេងនៅខាងក្រោមផ្ទះ ក្រោយមកជនរងគ្រោះក៏បានឡើងទៅលើផ្ទះតែម្នាក់ឯង ស្រាប់តែផ្សែងខ្មៅលាយជាអណ្ដាតភ្លើងបានឆាបឆេះ បណ្តាលឱ្យជាប់ជនរងគ្រោះឆេះស្លាប់។

បន្ទាប់ពីទទួលបានដំណឹងថា មានករណីអគ្គិភ័យ ភ្លាមៗ លោកវរសេនីយ៍ឯក ព្រហ្ម យ៉ន នាយការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បញ្ជារថយន្តពន្លត់អគ្គីភ័យចេញជួយអន្តរាគមន៍បាញ់ពន្លត់ ដើម្បីបង្ការកុំឱ្យមានការរាលដាលដល់ផ្ទះអ្នកជិតខាង។

ក្នុងកិច្ចប្រតិបត្តិការនេះ កម្លាំងសមត្ថកិច្ចប្រើប្រាស់រថយន្តពន្លត់អគ្គិភ័យចំនួន១៨គ្រឿង ទើបគ្រប់គ្រងឱ្យរលត់ទៅវិញទាំងស្រុង។ ចំពោះមូលហេតុបណ្តាលឱ្យមានការឆាបឆេះ កម្លាំងសមត្ថកិច្ចជំនាញពន្លត់អគ្គីភ័យកំពុងបើកការស្រាវជ្រាវបន្ត ដើម្បីរកមូលហេតុទាក់ទិននឹងអគ្គិភ័យខាងលើនេះ ៕

ដោយ ៖ ហេង អុីងម៉េង