រយៈពេល៣៥ថ្ងៃ សាលាដំបូងរាជធានី ខេត្ត ទទួលបានសំណុំរឿងក្មេងទំនើង ២៤៤ករណី

ក្នុងរយៈពេល៣៥ថ្ងៃ ដែលគិតចាប់ពីថ្ងៃទី២៣ ខែឧសភា ដល់ថ្ងៃទី២៧ ខែមិថុនា ឆ្នាំ២០២៤ សាលាដំបូងរាជធានី ខេត្ត បានទទួលចាត់ការលើសំណុំរឿងពាក់ព័ន្ធករណីក្មេងទំនើងចំនួន ២៤៤ ករណី ។

ពាក់ព័ន្ធករណីក្មេងទំនើង ២៤៤ករណីខាងលើនេះ មានជនសង្ស័យចំនួន ១៣២៩ នាក់ ក្នុងនោះតុលាការបានធ្វើការឃាត់ខ្លួនជនសង្ស័យចំនួន ៩៦៨ នាក់ ។

អ្នកនាំពាក្យក្រសួងយុត្តិធម៌ បានបន្តលើកឡើងទៀតថា ក្នុងនាមអ្នកនាំពាក្យក្រសួងយុត្តិធម៍ សូមថ្លែងអំណរគុណដល់សាលដំបូងរាជធានី​ ខេត្ត ដែលបានចាត់វិធានការក្នុងការអនុវត្តច្បាប់យ៉ាងម៉ឺងម៉ាត់ ក្នុងសំណុំរឿង ពាក់ព័ន្ធករណីក្មេងទំនើង ប្រកបដោយស្មារតីយកចិត្តទុកដាក់ និងការទទួលខុសត្រូវខ្ពស់ ដើម្បីការការពារសន្តិសុខ និងសុវត្ថិភាពជូនប្រជាពលរដ្ឋ ។

ជាមួយគ្នានេះដែរ អ្នកនាំពាក្យក្រសួងយុត្តិធម៌ ក៏បានសំណូមពរ និងអំពាវនាវដល់ឪពុកម្តាយ ព្រមទាំងអាណាព្យាបាលទាំងអស់ ត្រូវខិតខំតាមដាន អប់រំ និងទូន្មានប្រៀនប្រដៅដល់កូនៗ ឱ្យដើរតាមគន្លងត្រឹមត្រូវ ជៀសវាងនូវអំពើអបាយមុខ ដើម្បីក្លាយជាពលរដ្ឋល្អសម្រាប់សង្គមជាតិ និងសូមអំពាវនាវដល់យុវជនទាំងអស់ ដែលជាទំពាំងស្នងឫស្សីរបស់ប្រទេសជាតិ៕

អត្ថបទ៖ រដ្ឋា