សមត្ថកិច្ចដេញតាមឃាត់ខ្លួនជនសង្ស័យ ២ នាក់ បានភ្លាមៗ បន្ទាប់ពីឆក់ទូរស័ព្ទដៃជនបរទេស

នគរបាលព្រហ្មទណ្ឌ នៃក្រសួងមហាផ្ទៃ ប្រដេញនឹងឃាត់ខ្លួនបានជនសង្ស័យ០២នាក់ភ្លាមៗ បន្ទាប់ពីសកម្មភាពឆក់ទូរស័ព្ទដៃពីជនបរទេសបានសម្រេច។

ហេតុការណ៍នេះដែរបានកើតឡើងកាលពីវេលាម៉ោង ១០៖៤៥នាទីយប់ថ្ងៃទី២៩ ខែមិថុនា ឆ្នាំ២០២៤ ស្ថិតនៅត្រង់ចំណុចផ្លូវសុធារស សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។

ប្រភពពីសមត្ថកិច្ចបានឱ្យដឹងថា ខណៈកម្លាំងជំនាញកំពុងធ្វើការល្បាត ក៏ស្រាប់តែប្រទះឃេីញជនសង្ស័យចំនួន២​នាក់ជិះម៉ូតូ១គ្រឿង ម៉ាក ហុងដាឌ្រីម ពណ៌ខ្មៅ ឆ្នាំ២០១២ (ឡេីងសេរីឆ្នាំ២០២០) បានធ្វេីសកម្មភាពឆក់ទូរស័ព្ទដៃ​ពីជនរងគ្រោះជាជនជាតិកូរ៉េ ដែលកំពុងធ្វើដំណើរឆ្លងផ្លូវកើតហេតុបានសម្រេច។

ប្រភពពីសមត្ថកិច្ចបន្តទៀតថា ភ្លាមនោះកម្លាំងជំនាញ ការិយាល័យធ្វេីការប្រដេញ និងឃាត់ខ្លួនជនសង្ស័យបានចំនួន​០២នាក់ ក្នុងនោះមានឈ្មោះ៖ ជនសង្ស័យឈ្មោះ គួក ពិសី ភេទប្រុស អាយុ១៥ឆ្នាំ ជនជាតិខ្មែរ មុខរបរមិនពិតប្រាដក , ជនសង្ស័យឈ្មោះ មុំា ប្រុសវ័ន្ត ភេទប្រុសអាយុ១៦ ឆ្នាំ មុខរបរមិនពិតប្រាកដ ដោយជនសង្ស័យទាំង០២នាក់ ទីកន្លែងស្នាក់នៅជាមួយគ្នា ក្នុងភូមិព្រែថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

ក្នុងនោះដកហូតបាន ម៉ូតូ១គ្រឿងម៉ាក Dream C125 ពណ៌ខ្មៅ ពាក់ស្លាកលេខ ភ្នំពេញ 1AH-5487 ជារបស់ជនសង្ស័យ សម្រាប់ធ្វើសកម្មភាព។

បច្ចុប្បន្ន សមត្ថកិច្ចបាននាំជនរងគ្រោះមកដាក់ពាក្យបណ្តឹង នឹងធ្វេីការសាកសួរជនសង្ស័យ ដើម្បីកសាងសំណុំរឿងចាត់ការបន្តតាមនីតិវិធី៕