អាជ្ញាធរខណ្ឌប្ញស្សីកែវចុះស្ដារព្រែកអូវែងក្រោយមានភ្លៀងធ្លាក់២ថ្ងៃជាប់គ្នា

រដ្ឋបាលខណ្ឌប្ញស្សីកែវ បានចុះពិនិត្យតាមប្រព័ន្ធលូព្រែកអូវែង ដែលជាប្រព័ន្ធរំដោះទឹកក្នុងមូលដ្ឋានខណ្ឌប្ញស្សីកែវ និង ជួយបូមទឹកតាមភូមិដែលមានទឹកជាន់លិច។

លោក ជិន ប៊ុនធឿន អភិបាលខណ្ឌឫស្សីកែវ និងមន្ដ្រីជំនាញពាក់ព័ន្ធរួមនឹងមន្ដ្រីមូលដ្ឋានសង្កាត់ បានចុះពិនិត្យស្ថានភាពទឹកជាក់ស្តែងក្នុងភូមិសាស្ត្រមូលដ្ឋានខណ្ឌ និងចុះណែនាំភ្លាមៗដល់អាជ្ញាធរមូលដ្ឋានសង្កាត់អោយកាយចេញនូវកាកសំណល់សំរាមផ្សេងៗពីមាត់លូបង្ហូរទាំងអស់ដើម្បីជួយសម្រួលដល់ចរន្តលំហូរទឹកអោយមានភាពរលូនឆាប់រហ័ស។

ក្នុងអំឡុងពេលដែលភ្លៀងបានធ្លាក់យ៉ាងខ្លាំងរយៈពេល២ថ្ងៃកន្លងមកនេះ រដ្ឋបាលខណ្ឌឫស្សីកែវ បាននិងកំពុងបន្តការងារ​ស្ដារប្រព័ន្ធព្រែកអូវែង ដែលជាប្រព័ន្ធលំហូរទឹកយ៉ាងសំខាន់ក្នុងការរំដោះការជន់លិចក្នុងភូមិសាស្រ្តមូលដ្ឋានខណ្ឌ ទាំងនេះស្ដែងអោយឃើញច្បាស់ពីការយកចិត្តទុកដាក់របស់អាជ្ញាធរខណ្ឌឫស្សីកែវ ដែលតែងតែបានចុះជាប់ជាមួយប្រជាពលរដ្ឋគ្រប់ពេលដែលជួបទុក្ខលំបាក៕

អត្ថបទ៖ រដ្ឋា